TAMWA ZNZ yawataka wadau kufuata mazuri ya mwaka 2020

Chama cha Waandishi wa Habari Wanawake Tanzania, Zanzibar (TAMWA ZNZ) kinawaomba wadau husika kufuata mazuri ya mwaka jana kuhusiana na kesi za udhalilishaji na kuacha mabaya wakati wa kushughulikia kesi za ukatili na udhalilishaji  wa kijinsia.

 

Mambo yaliyokwenda vizuri mwaka jana ni pamoja na kesi ya shambulio la aibu kutolewa hukumu kwa muda mfupi na yaliyokwenda vibaya ni watuhumiwa kuachiwa huru, wengine kupewa adhabu ndogo na kesi kuchukuwa muda mrefu bila kutolewa hukumu.

 

Kesi ya mtoto wa miaka tisa (9 ) aliyedaiwa kufanyiwa shambulio la aibu  na Juma Haji Ali (25) mkaazi wa shehia ya Mahonda Mwembe Mazizi ambayo imechukua muda wa  wiki moja tu  kukamilika kutoka kuripotiwa hadi kutolewa hukumu, Septemba 22, 2020 hadi Septemba 28,2020.

 

Juma amepewa adhabu ya kutumikia kifungo cha miaka saba pamoja na kulipa faini ya shillingi milioni moja kama ilvyoendeshwa na Hakimu Faraji Shomar Juma wa ya mahakama ya mkoa Mahonda. 

 

Ilidaiwa kuwa Juma alimshambulia mtoto huyo wa kike kwa kumuingiza ndani chumba bovu na kumfanyia kitendo cha kumdhalilisha kwa bahati nzuri mtoto huyo alipiga kilele hivyo watu wakiwemo wanaharakati walisikia na kuanza kuifuatilia.

 

TAMWA ZNZ kwa kuliona hilo inaamini kwamba vyombo vya sheria vina uwezo mkubwa katika kukabiliana na matukio hayo bila ya kuchukua muda mrefu na tunavipongeza vyombo vya sheria kwa hilo, ambapo kesi baadhi ya wakati huchukua zaidi ya miaka miwili. Tunaviomba vyombo vya sheria kutumia kesi hii kama ni muda halisi wa kuendesha kesi kama hizo katika mwaka huu wa 2021 na kuendelea. 

 

Hii itasaidia kutisha wabakaji kwamba hatua zinachukuliwa, itaongeza pia upatikanaji wa haki pamoja na kuwapa moyo mashahidi kuwa hawatatumia muda mrefu katika kufuatilia kesi zao. 

Kwa upande wa mambo yaliyokuwa vibaya ni pamoja na kujitokeza kwa uhalifu mpya ambao ni kuwachoma watoto sindano ambapo kadhia hiyo iliwakumba watoto  tisa (9) sihaba wazazi wa watoto walifanikisha kumpata mtuhumiwa huyo.  

 

Mhalifu mmoja aliyejulikana kwa jina la Salim Ali Malik ambaye ilithibitika Mahakamani kuwa aliwachoma watoto sita huko Daraja bovu na tarehe 24/8/2020 aliweza kubakia huru baada ya Mahakama ya Mwanzo ya Mwanakwerekwe kumuamuru mtuhumiwa kulipa shilingi laki 600,000 au kwenda kutumia kifungo cha miezi sita ambapo alilipa fidia hiyo.

Hivyo adhabu hiyo hailingani na kosa, kwani kitendo cha kuwachoma watoto  sindano bila ya sababu ni uhalifu mkubwa wa kuwaumiza watoto kimwili na kisaikolojia. 

 

Kwa mujibu wa wazazi ambao walihangaika kujua nini hasa dhamira ya kuchomwa sindano huko ni kwamba sindano hiyo inaweza kuwa ina sumu lakini hata hivyo walisema hukumu ilitolewa bila ya ripoti ya Mkemia Mkuu kusomwa Mahakamani.Watoto wengine watatu waliobakia walifanyiwa kitendo hicho huko shehiya ya Mwanyanya, Unguja. 

Halikadhalika, Disemba mwaka jana (2020) Mahakama ya Wete, Mkoa wa Kaskazini Pemba ilimwachia huru bila ya sharti lolote mtuhumiwa Salim Khamis Ali maarufu ‘Panga la shaba’ (43) mkaazi wa Taifu shehia ya Kinyasini aliyedaiwa kumbaka mtoto wake wa kumzaa mwenye umri wa chini ya miaka 13 huko Pemba kutokana na kukinzana kwa muda ambapo shahidi alisema alibakwa muda wa saa 10 jioni na hati ya mashtaka ilisema ni saa 3 za usiku na kwamba pia mtoto alikuwa ana sitasita.

 

Vile vile kesi za mauwaji ya wanawake zinaendelea kuchukua muda mrefu tangu ziliporipotiwa hali ambayo inakatisha tamaa kwa familia pamoja na jamii nzima ya wanawake kutokana na kuishi kwa khofu na pia uwezekano wa wahalifu kukimbia hukumu.

 

Kwa mujibu wa rikodi za TAMWA ZNZ tangu mwaka 2016, matukio 17 ya mauwaji ya wanawake yameripotiwa ambapo ni matukio tatu (3) tu ndiyo yaliyofikishwa katika Mahakama Kuu ya Zanzibar, ambapo kesi ya Wasila Mussa (21) na Hajra Abdallah Abdallah (21) zipo mahakamani, kwa upande wa kesi ya Samira sultan (56) imeondolewa na mahakama kwa kile kilichoelezwa ni kutokana na mashahidi kutofika mahakamani kutoa ushahidi.

 

Tunaamini kuwa mwaka 2021 taasisi na wadau husika zitajipanga vizuri kwanza kulinda wanawake na watoto ili wasifanyiwe vitendo hivi viovu na pia kuhakikisha kuwa hukumu kali zinachukuliwa na kwa muda muafaka dhidi ya wakosaji wote.