TAMWA ZANZIBAR YAMPONGEZA RAIS SAMIA

 

Chama cha Waandishi wa Wahabari Wanawake Tanzania, Zanzibar, (TAMWA ZNZ) kinampongeza, Samia Suluhu Hassan kuwa Rais wa awamu ya sita  wa Serikali ya Jamuhuri ya Muungano wa Tanzania na kuwa mwanamke wa kwanza nchini Tanzania na Afrika Mashariki kushika nafasi ya hiyo.

 

Uteuzi huo umetokea baada ya msiba wa aliyekuwa Rais wa Tanzania Dk. John Magufuli kufariki dunia hapo Machi 17 mwaka huu ambao TAMWA ZNZ imesikitishwa na msiba huo.

Rais Samia kwa hiyo kama inavyoelekeza katiba ya Jamuhuri ya Muungano wa Tanzania kifungu 37 (5) ameapishwa rasmi kuwa Rais wa Jamhuri ya Muungano wa Tanzania, ushindi mkubwa kwa jitihada za miaka mingi za ukombozi wa wanawake hapa nchini.

 

Kuapishwa kwa Mama Samia kuwa Rais wa Tanzania kutaweka mustakbali mpya kwa maendeleo ya jinsia hapa nchini pamoja na Afrika Mashariki kwa ujumla na kwamba kutatoa nuru zaidi kwa wanawake na wasichana kukwea/kupaa ngazi za uongozi.

 

Tunaiomba pia jamii ya Watanzania  kuondoa mawazo mgando kwa jamii ambayo hawaamini kwamba wanawake wanaweza kushika   nafasi za juu na hivyo kuchukua fursa hii ya kumuunga mkono Mhe Raisi pamoja na kuandaa wanawake zaidi kwenye nafasi za uongozi.

 TAMWA ZNZ inamtakia kila la kheri Mama Samia katika kipindi chake hichi kizito kutokana na kifo cha aliyekuwa Mkuu wake wa kazi na majukumu haya ya kuiendesha nchi katika nafasi ya juu kabisa. 

 

Mungu amjaalie Mama Samia aongoze kwa hekima, ushirikishaji, uadilifu na kuinua haki za wanawake na haki za binaadamu kwa ujumla.