DC Gondwe awaomba TARURA kuweka alama kuondoa mkanganyiko Mfumo wa Kielektroniki wa Ushuru wa Maegesho

 

Mkuu wa Wilaya ya Kinondoni, Godwin Gondwe akizungumza wakati akifungua Kikao cha Mafunzo juu ya Matumizi ya Mfumo wa Kielektroniki wa Ushuru wa Maegesho iliyotolewa na TARURA kwa Madiwani, Watendaji na Kamati hiyo.

 

Na Hussein Ndubikile, Dar es Salaam

Mkuu wa Wilaya ya Kinondoni Godwin Gondwe amewaomba Wakala wa Barabara Vijijini na Mijini (TARURA) alama elekezi zinazoonesha maeneo yao yote ya maegesho ya magari ili kuondoa mkanganyiko kwa wananchi kuhusu Mfumo wa Kielektroniki wa Ushuru wa Maegesho (TeRMIS) uliorejeshwa tena kutumika kuanzia Disemba Mosi mwaka huu.

Hayo ameyasema jijini Dar es Salaam wakati akifungua Kikao cha Mafunzo ya matumizi ya mfumo huo iliyotolewa na TARURA kwa Madiwani, Watendaji wa Halmashauri ya Manispaa ya Kinondoni pamoja na Kamati ya Ulinzi na Usalama ya Kinondoni.

Amesema wakati mfumo huo umerejeshwa tena kuanza kutumika ni vyema wakala hao wakafikiria kuweka alama kwenye maeneo ambayo mtu akipaki gari atatozwa ushuru huo ili kuepuka msuguano kati yao na wateja.

" Tunapoelekea mbeleni TARURA muweke alama za kuonyesha maeneo yenu yanayohusika kutoza ushuru huu mkifanya hivyo mtaondoa malalamiko kwa wateja," amesema DC Gondwe.

Amewapongeza TARURA kwa kutoa elimu elimu ya mfumo huo jinsi unavyofanya kazi kwani madiwani, watendaji na kamati hiyo watafikisha elimu kwa jamii.

Kwa upande wake, Mtaalamu wa Mifumo ya Tehama wa TARURA, Shadrack Mahenge amesema mfumo wa TeRMIS umeanzishwa na kurudishwa tena ili kudhibiti upotevu wa mapato, wakandarasi wa ukusanyaji ushuru kuchelewa kuwasilisha makusanyo kwa wakati pamoja na ugumu wa kupata taarifa sahihi za mapato yaliyokusanywa.

Mahenge amesema mfumo huo una faida nyingi ikiwemo ikiwemo kudhibiti ukwepaji ushuru baada ya kuwekewa ankara, kuongeza mapato kwa Serikali na upatikanaji wa taarifa za mapato yanayokusanywa.

Amefafanua kuwa kwenye mfumo huo kuna maeneo yameboreshwa yakiwemo ya utoaji elimu kupitia mitandao ya kijamii, Runinga, vipeperushi, matangazo ya barabarani na mafunzo kwa makundi maalum.

Maboresho mengine ni ulipaji wa ushuru ndani ya siku 14,  faini ya Sh 10,000 kutoka Sh 30,000 baada ya siku hizo, ushuru kwa saa Sh 500  huku kwa siku Sh 2500 kutoka Sh 4500 pamoja na kumbukumbu namba kupatikana ndani ya saa moja.

Nae, Mwakilishi wa Meneja Mkuu wa Mkoa wa Dar es Salaam, Mhandisi Lutufyo Mwakigonja amesema maoni, mapendekezo yaliyotolewa wakati wa mafunzo hayo yatafikishwa sehemu husika ili yafanyiwe kazi.

Mhandisi Lutufyo amesema mafunzo hayo ni endelevu kwa kuwa ni muhimu katika kuhakikisha elimu sahihi ya matumizi ya mfumo yanaeleweka kwa watumiaji.

Mstahiki Meya wa Manispaa hiyo, Songoro Mnyonge amewapongeza TARURA na kwamba elimu waliyopewa wataifikisha katika jamii ili kusaidia wananchi kupata uelewa wa mfumo huo.