Jeshi la Polisi Kanda Maalumu lawashikilia wawili kwa mauaji, nane kwa wizi wa kutumia silaha

Kamanda wa Kanda Maalumu ya Dar es Salaam, Jumanne Muliro.

 

Na Hussein Ndubikile, Dar es Salaam

Jeshi la Polisi Kanda Maalumu ya Dar es Salaam limesema linawashikilia watu wawili kwa tuhuma za mauaji huku likibainisha kuwakamata watuhumiwa nane kwa makosa ya uhalifu.

Akizungumza na wanahabari jijini humo Kamanda wa Kanda hiyo Jumanne Muliro amesema katika tukio la kwanza wanamshikilia Selemani Haruna (24) mkazi wa Kimara Temboni kwa mauaji ya binti wa kazi aitwaye Editha Charles.

Kamanda Muliro amebainisha kuwa mtuhumiwa alitenda kosa hilo Julai 6 mwaka huu asubuhi ambapo alifika kwa kazi ya kuweka umeme kwenye nyumba ya Agatha Stanlaus ndipo alipomshambulia binti huyo kwa kitu chenye ncha kali na kwamba baada kutekeleza unyama huo alivunja mlango wa mwenye nyumba na kuiba Sh 1.8.

Amesisitiza kuwa baada ya mauaji mtuhumiwa huyo aliuficha mwili wa marehemu kwenye stoo ya nyuma hiyo na kwamba kabla ya kufanya kitendo mtuhumiwa alikuwa akijua muda anaotoka na kurudi nyumbani mwenye nyumba hiyo.

Ameongeza kuwa jeshi la polisi lilifanya uchunguzi na mtuhumiwa alipohojiwa alikiri kuonyesha kiasi cha fedha Sh 6,000,000 kilichobakia baada ya kununua simu na vitu vingine hivyo atafikishwa mahakamani.

Katika tukio la pili, Kamanda Muliro amesema wanamshikilia mtuhumiwa Thomas Ziganyike (71) Mstaafu wa Jeshi la Wananchi wa Tanzania (JWTZ) Mkazi wa Mbezi Juu kwa kumpiga risasi mfanyabiashara.

Kamanda Muliro amefafanua kuwa tukio hilo lilitokea Julai 9 mwaka huu ambapo marehemu akiwa anaangalia kiwanja chao mtuhumiwa alitoka nje na kumpiga risasi na kwamba walipofanya uchunguzi walikuta maganda manne ya risasi na kwamba mtuhumiwa atapelekwa mahakamani.

Katika hatua nyingine, jeshi hilo linawashilia watuhumiwa sugu 8 kwa makosa ya uhalifu wa kutumia silaha.

Kamanda Muliro amesema mtuhumiwa Jumanne Omari mkazi wa Mwikabe na wenzake 7 walikamatwa katika oparesheni kali dhidi ya uhalifu walikutwa na Runinga nne, Kompyuta mpakato 2, Subwofer, simu za aina mbalimbali, vifaa vya kuvunjia, visu, mapanga na bisibisi.

Pia amesema watuhumiwa hao wamekutwa gari namba T 787 DGW Toyota ambalo wanalitumia kubebea vitu vya wizi.