FEISAL ATWAA TUZO YA MWEZI NBC PREMIER LEAGUE

Na Mwandishi Wetu
 
KIUNGO wa timu ya Young Africans, Feisal Salum, amechaguliwa kuwa Mchezaji Bora wa mwezi Septemba wa Ligi Kuu ya NBC, huku Kocha Mkuu wa timu ya Namungo FC, Honour Janza akiibuka Kocha Bora wa mwezi huo.  
 
Kikao cha Kamati ya Tuzo za TFF kilichokutana Dar es Salaam mwishoni mwa wiki iliyopita kilimchagua Feisal, baada ya kuonesha kiwango kizuri kwa mwezi Septemba na kutoa mchango mkubwa kwa klabu ya Yanga ikiwa ni pamoja na kufunga mabao mawili.
 
Feisal aliwashinda Mosses Phiri wa Simba SC na Reliants Lusajo wa Namungo FC. Kwa upande wa Honour Janza aliwashinda Charles Mkwasa wa Ruvu Shooting na Thiery Hitimana wa KMC FC ambapo kwa mwezi huo Namungo iliifunga Ruvu Shooting bao 1-0, pia ikaifunga Coastal Union bao 1-0.
 
Pia Kamati ya Tuzo imemchagua Meneja wa uwanja wa Majaliwa, Lindi, Simon Mwambe kuwa Meneja Bora wa Uwanja kwa mwezi Septemba kutokana na kufanya vizuri katika menejimenti ya matukio ya michezo pamoja na masuala yanayohusu miundombinu uwanjani.