RITA YAWAASA VIONGOZI WA KAMATI YA MARIDHIANO YA AMANI NA ULINZI KUANDIKA WOSIA ILI KUEPUSHA MIGOGORO YA MALI KATIKA FAMILIA

Mwanasheria wa Serikali kutoka RITA, Joseph Mwakatobe, akitoa elimu kuhusu huduma ya wosia na mirathi kwa viongozi wa Kamati ya Maridhiano ya Amani na Ulinzi jijini Dar es Salaam leo Novemba 12, 2022.

Baadhi ya viongozi wa dini wakiwa katika mkutano huo.

Washiriki wakiuliza maswali.

Mwenyekiti wa Kamati ya Amani na Jumuiya ya Maridhiano, Sheikh wa Mkoa wa Dar es Salaam, Alhad Mussa Salum akizungumza katika mkutano huo. 

Na Mwandishi Wetu

 

Wakala wa Usajili Ufilisi na Udhamini(RITA) umewaasa viongozi wa Kamati ya Maridhiano ya Amani na Ulinzi kuandika wosia mapema ili kuepukana na migogoro ya mali katika familia zao pindi watakapoaga dunia.

 

Hayo yamesemwa leo Novemba 12, 2022 na Mwanasheria wa Serikali kutoka RITA, Bw. Joseph Mwakatobe alipokuwa akitoa elimu kuhusu huduma ya wosia na mirathi katika mkutano uliofanyika katika ukumbi wa Karimjee jijini Dar es Salaam. 

Bw. Mwakatobe amesema katika ulimwengu wa sasa suala la kuandika wosia ni mtambuka hivyo jamii inapaswa kuzingatia hilo na kuchukua hatua mapema. 

 

"Moja ya madhara ya watu kutokuandika wosia ni kusababisha migogoro ya kifamilia inayopelekea wanufaika kukosa haki zao katika kurithi mali za marehemu" alisema Bw. Mwakatobe.

Kwa upande wake Mwenyekiti wa kamati za Amani na Jumuiya ya maridhiano Tanzania ambaye ni mgeni rasmi, Dkt. Shk. Alhad Mussa Salum ameishukuru RITA Kwa kutoa elimu ya kina kwa viongozi hao na kuwaomba waendelee  kuelimisha jamii kwani huduma ya wosia ni muhimu sana katika maisha ya watanzania. 

 

"Napenda kuishukuru Taasisi ya RITA Kwa elimu nzuri ya wosia lakini ombi langu ni kuendelea kutoa elimu hii muhimu mara Kwa mara ili kila mtanzania apate maarifa haya na kuyatumia ipasavyo" alisema Dkt. Shk. Alhad Mussa.

Hatahivyo lengo la mkutano huu ni kufanya  maridhiano ya maandalizi ya kongamano la maadili  la viongozi wa dini ngazi ya kitaifa linalotarajiwa kufanyika Novemba 28 mwaka huu katika ukumbi wa Mwalimu Nyerere, Dar es Salaam.