UTT AMIS yatekeleza kwa vitendo maagizo ya Waziri Mkuu

WAZIRI MKUU Kassim Majaliwa amesema watoa huduma za kifedha hawana budi kujenga uelewa wa kutosha kwa wananchi kabla ya kufunga nao mikataba, pamoja na kuwafafanulia taratibu na masharti yao kabla hawajatoa kwao huduma hizo za fedha. 

 

Pia amewataka watoa huduma hao waweke mkakati mahususi wa kuongeza matumizi huduma kwa njia ya kidijitali pamoja na kuzisogeza hadi maeneo ya pembezoni na vijijini ili wananchi walio wengi wanufaike.

“Watoa huduma za fedha ongezeni ubunifu katika utoaji wa huduma. Toeni huduma zinazoendana na wakati, mahitaji ya soko na kuzingatia uhitaji wa makundi mbalimbali katika jamii. Suala hili liende sambamba na kuwaunganisha wajasiriamali na fursa mbalimbali zinazotolewa na sekta ya fedha katika kukuza na kuimarisha biashara zao. "

 

Amesema lengo la maadhimisho ya Wiki ya Huduma za Fedha Kitaifa na Maonesho ya Huduma za Fedha yamejikita katika kujenga uelewa kwa wananchi kuhusu matumizi sahihi ya huduma za fedha zinazotolewa, kusimamia vizuri rasilimali fedha ikiwa ni pamoja na kuimarisha utamaduni wa kujiwekea akiba, kukopa kutoka vyanzo salama na njia sahihi za kulipa madeni ili kujenga uchumi na kuondoa umaskini. 

 

Naye, Waziri wa Fedha, Dkt. Mwigulu Nchemba amesema Serikali inaendelea kukuza uelewa kwa Watanzania kuhusu masuala ya kifedha huku akitoa wito kwa Watanzania kuweka utaratibu wa kusoma vigezo na masharti ya huduma za kifedha wanazopata kutoka katika taasisi mbalimbali za kifedha ili kuepuka changamoto zinazoweza kujitokeza baadae. 

 

Kwa Upande wake, Katibu Mkuu wa Wizara ya Fedha Bi. Natu El-maamry amesema maadhimisho hayo ya tatu ni muendelezo wa jitihada za Serikali katika kuongeza uelewa wa masuala fedha kwa Watanzania ili waweze kuwa na uelewa kuhusu matumizi sahihi ya huduma za kifedha.

Waziri Mkuu Kassim Majaliwa, akitoa hotuba yake wakati wa ufunguzi rasmi wa Maadhimisho ya Wiki ya Huduma za Fedha Kitaifa na Maonesho ya Huduma za Fedha jijini Arusha.
 

Afisa Masoko na Uhusiano wa Kampuni ya Uwekezaji ya UTT AMIS, Martha Mashiku (wa pili kulia), akitoa elimu ya uwekezaji wa pamoja kwa wananchi ikiwa ni sehemu ya utekelezaji wa maagizo ya Waziri Mkuu Kassim Majaliwa aliyoyatoa kwa Wizara ya Fedha kusimamia na kuratibu utekelezaji wa Programu ya kutoa elimu ya fedha kwa umma na kuhakikisha kuwa elimu hiyo inawafikia wananchi wengi zaidi mijini na vijijini.

Afisa Masoko na Uhusiano wa Kampuni ya Uwekezaji ya UTT AMIS, Martha Mashiku (kulia), akiwa na Afisa wa UTT kutoka Mkoa wa Arusha katika Wiki ya Huduma ya Fedha Kitaifa, jijini Arusha.