YANAYOJIRI KATIKA AFCON 2013 KWA UFUPI

EMMANUEL ADEBAYOR NAYE AUPONDA UWANJA WA MBOMBELA

NELSPRUIT, Afrika Kusini

EMMANUEL Adebayor amelalamika kwa Shirikisho la Soka barani Afrika (Caf) na Kamati ya Maandalizi ya michuano ya Mataifa Afrika juu ya hali mbaya katika sehemu ya kuchezea ‘pitch’ ya Uwanja wa Mbombela ulioko jijini hapa.

Nyota huyo wa timu ya taifa ya Togo anayekipiga Tottenham Hotspur, aliulalamikia uwanja huo waliocheza na kuambulia sare ya bao 1-1 dhidi ya Tunisia na kufanikiwa kutinga robo fainali kwa mara ya kwanza katika historia ya nchi hiyo.

Katika mechi yao ya robo fainali hapo Jumapili, Togo inatarajia kushuka dimbani kuwavaa Burkina Faso katika mtannange wa kukata na shoka unaosubiriwa kwa hamu.

Nahodha wa Zambia, Chris Katongo pia mapema wiki hii aliutaja uwanja huo kuwa mbovu uliochangia kuwanyima nafasi ya kushinda mechi zao, kutokana na sehemu ya kuchezea kukosa ubora.

"Kwa mara nyingine tena sisi tuko Afrika – Afcon ni michuano mikubwa kwa bara la Afrika na ulimwengu mzima unafuatilia nini kinafanyika kupitia michuano hii. Huwezi kucheza soka safi katika ‘pitch’ kama hii," alilalamika Adebayor.

NAHODHA NIGERIA JOSEPH YOBO AWAONYA TEMBO WA IVORY COAST

JO’BURG, Afrika Kusini

NAHODHA wa timu ya taifa ya Nigeria, Joseph Yobo ameitaja robo fainali ya Mataifa Afrika kati yao na Tembo wa Ivory Coast ni moja ya mechi kali na kubwa kuwahi kutokea katika historia ya michuano hiyo.

"Hakutakuwa na mechi kubwa barani Afrika kama hiyo na, bila shaka, tutakuwa kikosi kisichopewa nafasi yoyote, dhidi ya timu ya daraja la juu mno Afrika. Lakini mchezo utaamuliwa ndani ya uwanja," alisema Yobo, ambaye hii ni michuano yake ya sita.

"Kila mmoja anatutarajia sisi kwamba tutapoteza mechi hii, lakini sisi kama wachezaji hilo liko akilini mwetu na tutahakikisha tunaingia dimbani Jumapili kuzuia hilo dhidi ya Ivory Coast," aliunga mkono winga wa Chelsea Victor Moses, ambaye alifunga mara mbili dhidi ya Ethiopia na kufuzu hatua hii.

"Wana wachezaji wazuri na bora kama Didier Drogba, mmoja wa washambuliaji hatari zaidi Afrika. Lakini sisi kama timu tutakuwa makini na kiwango chetu wenyewe mchezoni," alimaliza Moses.

WAZIRI WA MICHEZO WA AFRIKA KUSINI FIKILE MBALULA ATAMBIA MAFANIKIO

JO’BURG, Afrika Kusini

WAZIRI wa Michezo wa Afrika Kusini, Fikile Mbalula Alhamisi amezungumza na vyombo vya habari na kusema nchi yake imefanikiwa kuandaa kwa mafanikio makubwa michuano ya Kombe la Mataifa Afrika (Afcon 2013).

"Hadi hatua hii ya Afcon 2013... tunaweza kutangaza kwamba imefanikiwa kwa kiasi kikubwa," alisema Mbalula jijini hapa, huku hatua ya makundi ikitimishwa na robo fainali ikitarajia kuanza kupigwa Jumamosi.

"Tangu kuanza kwa michuano hii hadi sasa, kumekuwa na ongezeko kubwa la mahudhurio viwanjani. Afrika Kusini daima wanabaki kuwa wenyeji bora na wazuri. Hakuna ishara hasi kutoka kwa mashabiki wa hapa."