'Darasa’ ajipanga kulikabili soko la muziki kivingine

Na Elizabeth John

MSANII nyota wa miondoko ya hip hop, Sharifu Thabiti ‘Darasa’ amepanga kuwa na utaratibu rasmi wa kuuza albamu yake ya kwanza ambayo iko katika hatua za mwisho kukamilika.

Akizungumza na Habari Mseto, Dar es Salaam juzi, Darasa alisema kwa sasa anaandaa michakato hiyo kuepuka ubabaishaji katika soko la muziki nchini ambalo linapunguza maslahi katika kazi za sanaa hiyo.

“Sihofu changamoto zilizopo sokoni katika usambazaji albamu kwani najipanga kwa lengo la kukupambana ili kuhakikisha nafanya vizuri na kuweka historia nyingine,” alisema Darasa.

Alisema  kwa vile msanii kamili, ni lazima awe na albamu sokoni kwa heshima na hadhi yake katika jamii, basi kazi zake ni muhimu kuwa na hadhi inayostahili kulingana na ubora wake sokoni.

Aliongeza kuwa albamu yake inatakuwa na nyimbo 14 huku ikitarajiwa kuingia sokoni wakati wowote kuanzia sasa baada ya mchakato kukamilika.