WAISLAM NA WAKRISTO WATAKIWA KUSHIRIKIANA

Na Shehe Semtawa

WAUMINI wa dini za Kiislam na Kikristo nchini wametakiwa kushirikiana katika kazi mbalimbali zitakazosaidia kuinua pato la mtu mmoja mmoja na taifa kwa ujumla.

  

Kauli hiyo ilitolewa jijini Dar es Salaam jana, Msemaji wa wakilishi hao, ambaye pia ni muumini  wa Kanisa la  Kituo cha Mibaraka Tele (Pentekoste), kilichopo Tabata Dampo Nicku Mordi, wakati wa mkutano wa nchi 14, uliokuwa na lengo la kujadili maendeleo ya wananchi wanaoishi vijinini katika Bara la Afrika.

Alisema ushirikiano huo  utasaidia kuleta chachu ya maendeleo katika jamii kupitia shughuli mbalimbali zikiwemo zile za kuboresha miradi inayoanzishwa karibu nao.

“Kwa kwa kushirikiana kati ya waumini wa dini hizo kutaweza kusaidia kama katika eneo lao wamefanikiwa kujenga barabara kutoka eneo la kanisa hadi barabara kuu”alisema Dk Mordi.

  

Dk. Mordi alifafanua kuwa wachungaji wa makanisa na viongozi wa dini nyingine wanao wajibu kutoa mafunzo kwa waumini wao, ambayo pia yatasaidia kudumisha amani na kupatikana mafanikio ya kweli kimaendeleo nchini.

Akitolea mfano  kauli ya  Mwalimu Julius Nyerere isemayo, ‘Umoja ni nguvu na  Utengano ni udhaifu’ alitumia fursa hiyo kuwahimiza waumini hao kuungana kama Mungu alivyokusudia.

  

Naye Mchungaji wa Kanisa hilo, Flastory Mdabila, aliwataka Watanzania kutafuta mbinu za kuinua maendeleo ya nchi badala ya kuingojea serikali.

“Kila shughuli za maendeleo sio lazima zifanywe na serikali kuna nyingine ambazo inatubidi kutoa msukumo ili serikali ione na kuchangia”alisema Mdabila.