Star Times, Star TV watunishiana msuli

DAR ES SALAAM, Tanzania

MAMLAKA ya Mawasiliano nchini (TCRA), imeitaka Kampuni ya Sahara Media Group kurudisha chaneli yake kwenye mtandao wa StarTimes kabla ya  saa 10:00 jioni.

Akizungumza na wandishi wa habari jijini Dar es Salaam, Mkurugenzi Mkuu wa mamlaka hiyo, Profesa John Nkoma, alisema kampuni hizo kwa pamoja hazina haki ya kuwanyima wananchi mawasiliano kutokana na mgongano wao wa kimasilahi.

Alisema agizo la kuitaka Star TV kurudisha chaneli inatokana na leseni yake ambayo imeambatana na masharti ambayo ni kutoa huduma na si vinginevyo.

Profesa Nkoma alisema kitendo cha kutorudisha huduma hiyo kitatafsiriwa kuwa imeshindwa kutoa huduma, hivyo ni vema wakatambua kuwa wanaweza kunyang’anywa leseni.

“Leo tuliwaita Star TV na kuwauliza ni kwa nini haikuonekana na tumewataka waeleze ni kwanini wamevunja sheria ya kutotoa huduma kwa wananchi,” alisema Profesa Nkoma.

Hata hivyo, Profesa Nkoma  alisema kuwa imeziita kampuni hizo na anatarajia kukutana nazo Juni 17  mwaka huu ili kila mmoja kujieleza ikiwezekana kumaliza mgongano huo unaonekana kuwa wa kimasilahi zaidi.

Naye Meneja wa Sahara Media Group, Nathan Lwehabura, akitolea ufafanuzi kuhusu tukio hilo, alisema  Mei 23,  mwaka huu Star TV kupitia mwanasheria wake iliwataka StarTimes kuiondoa kwenye king’amuzi chao ifikapo saa sita usiku wa Mei 31 mwaka huu  kutokana na kurusha na kuuza maudhui na vipindi vyake bila idhini na kukiuka sheria za hakimiliki (copyright laws).

Lwehabura alisema katika barua hiyo Star TV iliwakumbusha StarTimes kwamba hawakuwa na mkataba wa kurusha kituo hicho kwa mujibu wa sheria ya mawasiliano (EPOCA) pia hawana haki ya kutumia maudhui yake bila idhini chini ya sheria ya hakimiliki ya Tanzania na kimataifa.

Alisema Mei 31, mwaka huu StarTimes/Star Media walijibu na kudai kwamba hawajakiuka sheria yoyote wakasisitiza wataendelea kuirusha Star TV kutekeleza matakwa ya sheria ya EPOCA na kanuni zake.

Lwehabura alisema Juni 6, mwaka huu, Star TV iliwaandikia tena StarTimes ikisisitiza nia yake ya kuchukua hatua zaidi kutokana na wao kuendelea kukaidi ombi hilo na kuainisha mapungufu kadhaa ya kisheria kwa upande wao yanayoifanya Star TV ijiondoe kwenye king’amuzi chao ifikapo saa sita usiku wa Juni 08 mwaka huu.

Aidha, Star TV ilieleza Star Media (T) Ltd ambayo inamilikiwa kwa pamoja na Star Times na TBC ina leseni ya miundombinu ya kurusha matangazo ya televisheni kupitia mfumo wa DTT (Multiplex Operator License).

Aliongeza kuwa leseni hiyo inawaruhusu kuingia makubaliano (Service Level Agreement-SLA), na vituo mbalimbali kuwarushia matangazo yao lakini StarTimes hawana leseni ya kutoa huduma ya maudhui (Content Service Provider License-CSP).

Lwehabura alifafanua kuwa StarTimes ni kampuni ya kimataifa iliyoandikishwa (China),  inayotoa huduma ya maudhui katika nchi mbalimbali za Afrika ikiwemo Tanzania.

Alisema ili kupata maudhui inalazimika kuingia mikataba na vituo vya televisheni kabla ya kuviingiza kwenye king’amuzi chake na baadaye kuuza maudhui hayo (subscription/Pay TV), kwa walaji katika mataifa hayo.

Alisema StarTimes inachukua vituo vya TV ikiwemo Star TV bila idhini yao na kuviweka kwenye king’amuzi chake kwa kisingizio kwamba wanaruhusiwa na sheria ya EPOCA na kanuni zake.

Sheria hiyo inasisitiza juu ya kuwapo kwa mkataba wa makubaliano (SLA) kati ya pande mbili husika.

Lwehabura alisema kwamba maudhui ya TV za Tanzania yanauzwa kwa walaji katika nchi nyingine kama vile Rwanda, Burundi, Kenya, Uganda, Nigeria na nyinginezo bila idhini ya wamiliki wake.

Alisema TV zinazomiliki maudhui hapa nchini hazina uwezo wa kuidhibiti StarTimes isirushe maudhui yao nje ya Tanzania kwa kuwa baadhi ya maudhui wanayoyanunua nje kama vile tamthilia na vipindi vingineyo haviruhusiwi na watunzi au wasambazaji wake yarushwe nje ya Tanzania (Territorial Rights).

Lakini pia uhusiano wa makampuni haya mawili Star Media (T) Ltd na Kampuni ya Star Times ambayo ni ya China, yenye matawi katika nchi nyingi za Afrika katika uendeshaji wa matangazo ya dijitali haujabainishwa vizuri ili kujua nani ni nani na nini anachofanya hapa Tanzania katika misingi ya maelewano ya kibiashara.

Alisema kutokana na mantiki ya hoja hizo Star Times waliiondoa mara moja Star TV kwenye king’amuzi chao Juni 8, mwaka huu kama walivyoelekezwa na Star TV.

Alisema Star TV haioni sababu ya kulazimishwa na TCRA kurushwa na Star Times pasipo kuondoa hitilafu hizo za kisheria na bila kuangalia sheria nyingine zinazolinda haki za TV huru kama sheria ya hakimiliki na sheria ya ushindani katika soko moja.

Serikali ya Tanzania ni mwanachama wa WTO na pia WIPO (World Intellectual Property Rights Organization), hivyo kwa kulazimisha uvunjaji wa sheria za hati miliki ina maana inavunja haki zetu zilizopo kikatiba!

“Tutakwenda mahakamani kupata haki yetu hii muhimu,” alisema Lwehabura.

Alisema sheria hii inaweka kinga kwa vipindi vya radio, televisheni, nyimbo na sanaa zote, kwa kutaka kulazimisha StarTimes kupora vipindi vya Star TV inadhihirisha kilio cha wasanii wa Tanzania wasivyolindwa na serikali yao.

Lwehabura alisema taarifa iliyotolewa magazetini na Meneja Mawasiliano wa TCRA, Innocent Mungi,  kwamba chaneli tano za kitaifa lazima zirushwe na ving’amuzi vyote bure ni za kupotosha, kwa kuwa hata hiyo Star Times haizirushi bure, imekuwa ikibadilika kama kinyonga.

Alisema lakini makampuni ya kigeni kama vile Dstv na Zuku wao hawarushi matangazo ya TV nyingine bila makubaliano yanayotambulika kisheria.

Hata hivyo, vituo vikubwa vya TV vikiwamo Star TV, ITV, Channel 10 na TBC na vinginevyo visivyo vya kitaifa vinarushwa na makampuni ya BTL na TIN bila malipo yoyote ya mwezi na kwa ubora zaidi kuliko Star Times lakini inashangaza kuona TCRA inawakingia kifua StarTimes wanaowalipisha Watanzania badala ya kutetea vituo vya ndani visivyotoza chochote.