REDD'S MISS KINONDONI WAFANYA USAFI HOSPITALI YA MWANANYAMALA

Na Elizabeth John

WAREMBO wanao wania taji la  Redds Miss Kinondoni 2013/2014, leo wamefanya usafi katika hospitali ya Mwananyamala pamoja na kujionea hali ilivyo mbaya kwa wagonjwa.

Akizungumza baada ya kumaliza usafi huo, Redd’s Miss Kinondoni ambaye pia ni Miss Tanzania, Bridget Alfred alisema wameamua kufanya hivyo wakiwa na lengo la kufanya harambee ya kuchangisha hela kwa ajili ya kununua vitanda kwa akina mama wanaojifungua.

Alisema harambee hiyo itafanyika  keshokutwa katika ukumbi wa Ambassador Lounge uliopo Posta jijini Dar es Salaaam na Meya wa Manispaa ya Kinondoni, Yusuf Mwenda anatarajia kuwa mgeni rasmi.

“Huu ni mwanzo tub ado tunaendelea kutembelea hospitali mbalimbali, leo tumeanza Mwananyamala kesho (leo) tutakua hospitali ya Sinza pamoja na kutembelea mradi wa mabasi yaendao kasi,” alisema mrembo huyo.

Mashindano hayo ya Redds Miss Kinondoni yanatarajiwa kufanyika Juni 21 mwaka huu na yamedhaminiwa na Redds Orijino, Chilly willy energy drink, Oriflame natural beauty products, Times Fm na Jb Belmont hotel.

Naye Mganga Mkuu wa Manispaa ya Kinondoni, Dk Gunin Kamba aliwashukuru waandaaji wa mashindano hayo kwa harambee hiyo ambayo itasaidia afya za wagonjwa wa hospitali hizo kwa kiasi fulani.

“Mimi naomba wananchi wengine waige mfano huo kwani jukumu la usafi ni la kila mtu sio kuisubiri serikali peke yake, naomba liwe zoezi endelevu lisiishie hapa,” alisema Dk Kamba.