Makala; Je, ufisadi ni Busara?

‘Mbwa hawezi kumbeba Paka Mgongoni’

Na Bryceson Mathias

Tafadhali, naomba leo katika Hoja hii nianze na swali! Je hivi samba akitaka kumla mtu anaweza kupewa siku saba ajirudi iwapo anataka kumla mtu au huwa anamrarua tu?  Twebde pamoja kwenye kisa hiki.

Hivi karibuni madiwani wa Mkoa wa Kagera wanaokemea  ufisadi  na kuchukiwa na watawala, tulihabarishwa walitakiwa na Makamu Mwenyekiti wa Chama cha Mapinduzi  (CCM)  Taifa, Phillip Mangula na Katibu Mkuu wake , Abdulrahman Kinana, wamalize mgogoro wao “kwa busara.”

Mbali ya juhudi za Viongozi hao wa juu wa CCM, ni swali langu kwa wenye uchungu na nchi hii, Je, Ufisadi ni Busara? Lakini swali langu la pili lisilo na kigugumizi ni hili, Simba akitaka kukutafuna anaweza kupewa muda ajirudi ili asikutafune? Si kweli, atakurarua tu!

Kusudi la makala hii ni namna gani maslahi ya Taifa na haki za maendeleo ya wananchi zinachakachuliwa na kubarikiwa kwa kukutazamisha mgogoro sugu uliopo baina ya meya, Anatory Amani , na Madiwani wa CCM, CHADEMA na CUF, ambao Agosti 5, walimfukuza rasmi Meya wa Manispaa yao ya Bukoba.

Sababu Madiwani hao wa wananchi kuamua kumfukuza Meya Amani, ni  kunatokana na kile wanachodai hawana Imani naye, kufuatia  kuwepo tuhuma za Ufisadi  wa Mradi wa  viwanja Bukoba,

Mradi wa Soko, Mradi wa ujenzi wa stendi kuu ya mabasi na mtafaruku wa nyaraka.

Aidha kutokana na kuwepo ufujaji wa tuhuma hizo za mamilioni ya fedha za miradi ya walipa kodi , wadau tunapata shida, Je kwa hali kama hiyo Viongozi wa CCM Taifa wanaweza kuona ni jambo tu la kusema tu mtuhumiwa na wanaosigana, wamalize tofauti zao? La hasha kuna hatua lazima zichukuliwe.

Vilevile haitoshi viongozi wanaotegemewa na wananchi kusimamia na kutatua kero zao, kama  viongozi wa Mkoa, Meya na Madiwani, kusema wamalize mgogoro kwa busara, wakati busara inayotakiwa katika ufujaji  huo wa fedha ni kuwajibishwa! Tangu lini wizi ukaitwa kusogeza?  

Tumehabarishwa kuwa, CCM na serikali mkoani humo hawataki Meya aondoke, na inadaiwa kunapangwa mpango wa kuwafukuza madiwani wao walioweka sahihi zao kumfukuza meya. Je hii maana yake ni kuukumbatia ufisadi huo au ni kuupaka rangi?

Kuna hofu kwamba, madiwani wa CCM waliosaini kumfukuza Meya huyo, hivi sasa wanatembea na kadi zao mfukoni tayari kwa kuzikabidhi iwapo uongozi wa chama chao utaamua kulinda ufisadi wa meya na kuwachukulia hatua wao.

Pengine sasa ifike mahali viongozi wetu waanze kujitathimini, kwa nini wanapofanya makosa ya tuhuma za ufisadi, wanakimbilia kujikinga mahakamani ili waendeleze michezo hiyo michafu?

Ilifahamika, Mkurugenzi Amani alipotakiwa aitishe kikao cha baraza la madiwani wa Bukoba na kukataa akihofu ndicho kingemfukuza, Meya na mkurugenzi wa manisapaa walikimbilia mahakamani kuweka pingamizi la kuzuia madiwani kuitisha kikao cha kumwondoa.

Ninaipongeza mahakama kwa kutupilia mbali shauri hilo, ili kutojiingiza kwenye tabia ya kukumbatia waharifu wanaodhulumu haki za wananchi wakiitumia taasisi hiyo kama kofia ya Chuma ya kulinda maovu.

Tunadokezwa kuwa, uamuzi wa meya na mkurugenzi kwenda mahakamani ulitokana na agizo la Mkuu wa Mkoa ambaye alimwandikia Mkurugenzi akimzuia kuitisha kikao cha baraza la madiwani kama alivyokuwa ametakiwa na madiwani hao kwa mujibu wa kanuni.

Kama viongozi tunaowaamini na kuwategemea kama Mkuu wa Mkoa, Mangula, Kinana, wanaweza kuongoza kundi la kutoa mawazo Mtuhumiwa huyo abebwe, ilihali wanafahamu fika uovu unaolalamikiwa dhidi ya Kiongozi huyo, wananchi waende kulalamika kwa nani?

Binafsi ninaunga Mkono hatua za Madiwani 16 wa Kagera kumng’oa Kiongozi wao kufuatia tuhuma zilizowekwa mbele yake, kimsingi tunahitaji viongozi watakaoongoza mapambano ya kukataa wananchi na Ulalahoi waliosababishiwa, wasidhulumiwe haki na maslahi yao.

Aidha nawashauri Mkuu wa Mkoa wa Kagera, Fabian Massawe, Makamu wa Mwenyekiti wa CCM Mangula na Katibu Mkuu Kinana kwamba, hatua ya kuwafukuza madiwani hao haimalizi mgogoro, na hakuna busara inayoweza kutumika kwenye ufisaji zaidi ya mtu kuwajibiaka.

nyeregete@yahoo.co.uk 0715933308