ABDUKIBA AMSAMBAZA KIBIBI

Na Elizabeth John

MKALI wa bongo fleva nchini, Abdukarim Kiba ‘Abdukiba’ amesambaza kazi yake mpya inayojulikana kwa jina la ‘Kibibi’.

Akizungumza jijini Dar es Salaam jana, Abdukiba alisema kutokana na ubora wa mashairi ya kazi hiyo, amelazima kutumia muda mwingi kuandaa kazi hiyoambayo anaamini itakubalika katika soko hilo.

“Sipendi kuzungumzia ndani yake kuna nini, naomba mashabiki waisikilize kwa umakini kwani ishaanza kusikika katika redio mbalimbali na pia katika mitandao ya kijamii,” alisema.

Alisema wapenzi wa kazi zake wamsubiri sokoni ana imani kazi hiyo itafanya vizuri kutokana na ujumbe uliomo ndani yake, licha ya kukaa kwa kipindi cha mwaka mmoja bila kutoa kazi mpya.

“Kama msanii unatakiwa kulisoma soko la muziki, mimi sikupenda kukurupuka katika kazi zangu, nina imani ukimya wangu utakuja na mafanikio,” alisema.

Abdukiba anatamba na baadhi ya ngoma zake kama ‘Kidela’, ‘Hatuna Habari Nao’, ‘Kizunguzungu’ na nyinginezo ambazo zilimweka pazuri katika soko la muziki huo.