HABARI MSETO BLOG

KAVUMBAGU ATUA AZAM FC

MABINGWA wa soka Tanzania Bara, Azam FC, wamemtwaa mshambuliaji mahiri wa Yanga, Didier Kavumbagu na kumwaga wino kukipiga Azam Complex kwa mwaka mmoja.

Kavumbagu alitua Yanga mwaka 2013 akitokea Atletico ya Burundi na katika misimu miwili ya kuichezea klabu hiyo, amefunga mabao 31 katika mechi 63 za mashindano yote.

Kwa mujibu wa mtandao wa Azam FC, wameingia mkataba wa mwaka mmoja na nyota huyo raia wa Burundi, wenye kipengele cha kuongezewa mwaka mwingine, iwapo atafanya vizuri katika mwaka wake wa kwanza.

“Tumepata mshambuliaji mzuri, ambaye tayari ana uzoefu wa kucheza Ligi Kuu ya Tanzania kwa misimu miwili, mchezaji huyu ni chaguo la Kocha wetu Joseph Omog, ambaye alivutiwa naye baada ya kumuona akichezea klabu yake ya zamani, Yanga SC,” alisema Katibu Mkuu wa Azam FC, Nassor Idrisa.

Kwa upande wake, Kavumbagu alisema, yeye ni mchezaji, kazi yake ni mpira na amemaliza mkataba Yanga, lakini viongozi hawamwambii kitu, hivyo amepata ofa nzuri Azam na kuamua kusaini.