HABARI MSETO BLOG

TIMU ZA TANZANIA ZAENDA NJE KUJIFUA KWA AJILI YA MAANDALIZI YA MICHEZO YA JUMUIYA YA MADOLA .Watakiwa kumfariji Rais Kikwete kwa medali

.Rais RT aipiga kombora Wizara ya Michezo 

Wawakilishi wa wachezaji wa timu za Tanzania wanaokwenda katika kambi ya mazoezi nje ya nchi kwa ajili ya kujiandaa na michezo ya Jumuiya ya Madola, Samson Ramadhan (kushoto), na Neema Mnaisyula (kulia), wakipokea kwa pamoja bendera ya taifa kutoka kwa Waziri wa Mambo ya Nje na Ushirikiano wa Kimataifa, Bernad Membe (wa tatu kushoto), wakati wa kuaga timu zinazokwenda kuweka kambi nje ya nchi kwa ajili ya maandali ya michezo ya Jumuiya ya Madola itakayofanyika Julai, Glasgow, Scotland. Hafla hiyo ilifanyika leo jijini Dar es Salaam. (Picha zote na Francis Dande)

Viongozi wa Shirikisho la Riadhaa Tanzania (RT),  wakiwa katika picha ya pamoja na Waziri wa Mambo ya Nje na Ushirikiano wa Kimataifa, Bernad Membe (wa nne kushoto), viongozi wa Wizara ya Habari, Vijana Utamaduni na Michezo pamoja na wachezaji wa Riadha watakaoshiriki michezo ya Jumuiya ya Madola, mara baada ya kukabidhi bendera ya taifa kwa timu za Tanzania zitakazokwenda kuweka kambi nje ya nchi kwa ajili ya michezo ya Jumuiya ya Madola itakayofanyika Julai Glasgow, Scotland. 

                                                    
                                             Na Mika Ndaba

WAZIRI wa Mambo ya Nje na Ushirikiano wa Kimataifa, Bernard Membe, amewataka wachezaji wanaokwenda katika kambi za kujinoa na Mashindano ya Jumuiya ya Madola ‘Commonwealth Games’ itakayofanyika jijini Glasgow, Scotland, Julai mwaka huu kuitumia vizuri ili waweze kurejea nchini na medali.

Membe, aliyasema hayo jana katika ukumbi wa mikutano wa kimataifa wa Mwalimu Nyerere jijini Dar es Salaam, wakati akiwaaga wachezaji 45 wanaokwenda nchi mbalimbali kushiriki mafunzo kwa ajili ya kuboresha viwango vyao kabla ya mashindano hayo ya Madola.

Alisema kitendo cha wao kufanya vizuri kitakuwa ni faraja kwa Rais Jakaya Kikwete, ambaye amekuwa mdau mkubwa wa maendeleo ya michezo, amekuwa na kiu ya kuondoka madarakani akiona medali zikitua nchini, hivyo waende wakitambua kuwa wamebeba dhamana kubwa ya Watanzania ambao wamechoka kuona wakirejea mikono mitupu.

“Rais alinipa ushauri kwamba vijana wetu wanakaribia kuingia kwenye michuano, hawa ndio wamebeba dhima ya taifa, hivyo wanatakiwa kuandaliwa vizuri ili waweze kuiletea nchi heshima mbele ya Wazungu,” alisema Membe huku akiwasihi kujiepusha na vitendo vya kuzamia ‘kujilipua’, kubeba dawa za kulevya na vitendo ambavyo vitaichafua fursa hii adhimu.

Alisema endapo watafanya vema katika michuano hiyo, wanaweza kujikuta wako katika maisha mengine, maana watageuka mashujaa wa Tanzania.

Kwa upande wake, Rais wa Shirikisho la Riadha Tanzania (RT), Anthony Mtaka, alisema wachezaji hao wanatakiwa kufanya jitihada katika mafunzo yao, ili watakaposhiriki Jumuiya ya Madola warejee na ushindi ili kuwavutia wadhamini kuwekeza katika michezo mingine nje ya soka kama ilivyo sasa.

Alibainisha kuwa mafunzo hayo yatasaidia kuboresha mchezo huo na kuweza kuleta ushindi nchini badala ya kubakia kuwa kama washiriki au watalii kama ilivyokuwa hapo awali.

“Hakuna mdhamini atakayejitokeza endapo tukishindwa, asilimia kubwa wamewekeza katika mpira wa miguu. Licha ya kusambaza barua katika wizara nne, lakini tumejibiwa moja tu na Mheshimiwa Membe, kwa hiyo inatakiwa kufanya vizuri kulipa fadhila na kujiwekea hazina ya baadaye,” alisema Mtaka huku akitoa changamoto kwa wizara yenye dhamana na michezo, kufanyia kazi hotuba ya Rais Kikwete siku ya Kifimbo cha Malkia, Ikulu, badala ya kuigeuza wizara ya kulipana mishahara tu, bila kuwajibika.

Katibu Mkuu wa Kamati ya Olimpiki Tanzania (TOC), Filbert Bayi, alisisitiza kuwa wachezaji wanaokwenda mafunzoni katika nchi walizopangiwa, wanatakiwa kushiriki vilivyo katika mazoezi, kwani hakuna mchezaji atakayekwenda Glasgow bila ya kuwa na kiwango stahiki.

“Tutaondoka na idadi ya wachezaji 50, lakini sisi tulipanga tuchukue watu 36, hivyo kutokana na Waziri Membe kutaka washiriki wote waende, basi inatakiwa kufanya juhudi za ushindi. Kwenda wote haimaanishi wengine wakatalii isipokuwa kushiriki katika mazoezi, ili waweze kuwa fiti kwa mashindano na kubeba medali,” alisema Bayi.

Timu za riadha, ngumi, judo, kuogelea, mpira wa meza na kunyanyua vitu vizito, ziliagwa jana, ambapo zitakwenza kujinoa China, Newzealand, Uturuki na Ethiopia. Zitaanza kuondoka kuanzia kesho na kundi la mwisho litaondoka Mei 4.