MWILI WA ADAM KUAMBIANA KUAGWA J' NNE LEADERS

Na Elizabeth John

MWILI wa aliyekuwa muigizaji na mtayarishaji wa filamu za Bongo, Adam Kuambiana unatarajiwa kuagwa kesho katika viwanja vya Leaders, kinondoni jijini Dar es Salaam.

Akizungumza na Habari  Mseto jijini Dar es Salaam jana, msanii Haji Adam ‘Baba Haji’ alisema, marehemu ataanza kuagwa saa 3 asubuhi katika viwanja hivyo kabla ya kupelekwa kuzikwa katika makaburi ya Kinondoni.

Alisema msiba wa marehemu unafanyika nyumbani kwake Bunju B njia panda ya Magwepande.

Kuambiana ambaye nyota yake katika tasnia hiyo ndio ilikuwa inaanza kung'ara kutokana na kuifanya kazi yake kwa uweledi wa hali ya juu, imezimika gafla wakati bado mchango wake ukihitajika.

 Msanii huyo ambaye alikuwa anatatizo la vidonda vya tumbo, alifariki juzi katika hospitali ya Mama Ngoma iliyopo Mwenge jijini Dar es Salaam alipopelekwa baada ya kuzidiwa wakati akiwa ‘location’ katika hotel ya Silver Rado iliyopo Sinza kwa Remy.

 Kuambiana alianza kusikia maumivu ya tumbo wakati yupo location wanapiga baadhi ya picha ya filamu yake mpya ambayo aliwashirikisha wasanii mbalimbali akiwemo msanii wa Bongo Fleva, Q Chillah.

Baadhi ya filamu ambazo alicheza na kuongoza Kuambiana ni pamoja na    Danija, Faith More Fire, Bad Luck, Scola,The Boss, Mr.Nobody,  Radhi ya Mke, Lost Sons, Chaguo Langu, My Fiance, Jesica, Life of Sandra,    Basilisa, My Flower, Regina, Born Again, Its Too Late, Fake Pastors, ‘Mr Kadamanja’ na nyingine.