SHILOLE ATAKA KUFANYA KAZI NA J LO, RIHANA

Na Elizabeth John

MWANADADA anayefanya vizuri katika tasnia ya muziki wa mduara, Zuwena Mohamed ‘Shishi Baby’ au ‘Shilole’, amesema malengo yake katika tasnia hiyo ni kufanya kolabo na msanii wa kimataifa akiwemo, Jenifer Lopez na Rihana.

Akizungumza jijini Dar es Salaam jana, Shilole alisema hayo ni malengo ambayo amejiwekea katika maisha yake na anauhakika atatimiza ndoto zake kutokana na kuonekana ana nia.

“Kila kitu kinawezeana chini ya jua, kwanini nishindwe mimi nina malengo yangu na namuomba Mungu kila siku ili nifanikiwe na nina uhakika nitaweza kwani hao ni watu wa kawaida sema tumezidiana viwango tu,” alisema.

Alisema anaomba mashabiki wake wakae mkao wa kula kwaajili ya kumpokea na kibao chake kipya ambacho anakiandaa.

“Kuna kazi yangu mpya ambayo naiandaa naomba wapenzi wangu wakae mkao wa kula kwani nahisi itakuwa bonge la wimbo kwani mashairi yametulia sana na yanaujumbe katika jamii tofauti na walivyonizoea kutoa kazi za mapenzi na kuburudisha,” alisema.

Shilole kwasasa anatamba na ngoma yake inayojulikana kwa jina la ‘Chuna Buzi’ ambayo imefanya vizuri zaidi licha ya kuwa na kazi nyingine kama, ‘Nakomaa na Jiji’, ‘Paka wa Baa’ na nyinginezo.