HELA ZA DIMPOZ ZAZUA KIZAAZAA MWEMBE YANGA

 Na Elizabeth John

INASEMEKANA hela alizorusha msanii wa muziki wa kizazi kipya nchini, Omary Nyembo ‘Ommy Dimpoz’ katika shoo ya kuhamasisha usafi katika Wilaya ya Temeke, ndio chanzo cha vurugu zilizotokea katika uwanja wa Mwembe Yanga, Temeke jijini Dar es Salaam.

Katika shoo hiyo iliyoanza saa 8 mchana katika viwanja hivyo, na kutarajiwa kumaliza saa 12 jioni ilikatishwa kutokana na vurugu, ilikuwa kwaajilili ya kuhamasisha usafi na kutambulisha video Mkude Simba huku akisindikizwa na wasanii kibao ambao wanatamba katika tasnia hiyo.

Akizungumza  mmoja wa wasanii ambao walikuwepo katika tukio hilo, ambaye hakutaka jina lake litajwe gazetini, alisema, chanzo cha vurugu ni Dimpoz kurusha hela kwa mashabiki ambapo kila mmoja alitaka kuzipata fedha hizo.

“Watu walijaa sana, nay eye aliporusha hela kila mmoja alitaka kuzifikia hizo hela, Dimpoz aliposhuka alipanda Abdul Sykes ‘Dully Sykes’ na watu wakaanza kurusha chupa jukwaani na wakimtaka aondoke, polisi wakaingilia kati na hapo vurugu ndipo zilipoanza,”.

Kwa upande wake Dully, alisema anasikitika sana kwa kuona watu wanamuona yeye ndiye aliyeanzisha fujo katika shoo hiyo kitu ambacho sio kweli.

“Polisi na mabaunsa ndio walianzisha fujo, kwasababu walikuwa wanawazuia watazamaji kusogea mbele kwa kuwapiga hivyo fujo ndio zilipoanza watu wakaanza kurusha mawe, chupa na viatu polisi wakaamua kupiga mabomu ya machozi watu wakaanza kusambaa na wengine kuumizana,” alisema Dully.

Naye Mussa Kitale ‘Kitale’ alisema, anawashukuru mashabiki wake kwa kufika kwa wingi katika onesho hilo ambapo anasema aliamua kuonesha tangazo moja tu kutokana na kuhofia vurugu baada ya kuona watu wamejaa sana.

Alipotafutwa Kamanda wa Polisi mkoa wa Temeke, Englibert Kiondo, na kutakiwa kuzungumzia hilo, simu yake ilipokelewa na sekretari wake na kudai kamanda yupo kwenye kikao.

Shoo hiyo iliandaliwa na E Redio ikiwa ni kwaajili ya kutambulisha redio hiyo pamoja na video za Mkude Simba ambazo zinarushwa katika redio hiyo na Times Fm.

Wasanii ambao walikuwa wameshapanda jukwaani ni pamoja na Q Chillah, Inspector Haroun, Shilole, Kitale, Ommy Dimpoz na Juma Nature.