NKAMIA KUFUNGA MASHINDANO YA CESOPE,TIMU YA DODOMA YAANZA MAANDAIZI KWA USHIRIKI COPA COCA COLA,MSAMBULIAJI CDA APANIA KUIPANDISHA DARAJA TIMU HIYO

Na Hamida Ramadhani, Dodoma

NAIBU Waziri wa Habari Utamaduni na Michezo Juma Nkamia anatarajia kufunga mashindano ya CESOPE Cup leo katika uwanja wa Bahi Wilayani Bahi.

 Akizungumza na Waandishi wa Habari, Mkurugenzi wa CESOPE,Anton Lyamunda alisema lengo la Mashindano hayo ni kutoa elimu ya Mazingira kwa Vijana na kutoa Elimu ya Uraia pamoja na matumizi ya bwawa la Farkwa

Alisema Mashindano yanaendelea na Mabingwa katika  tarafa 4 za Mndemu,Bahi,Chipanga na Mwitikira zitajipatia Ngombe na Jembe la kukokotwa na Ng’ombe.

Lyamunda alisema Mashindano hayo yatagharimu jumla ya shilingi milioni 18.5 huku Bingwa wa Mashindano hayo akijinyakulia shilingi laki tano wa pili laki tatu na watatu laki mbili.

Alisema kuanzia Novemba 12 mwaka huu watatoa Elimu kwa siku nne kwa kutumia njia ya Video kwa kuitangaza taasisi na na hotuba za Baba wa Taifa ili kutoa elimu ya Uraia  kwa Vijana kuipenda Nchi yao.

‘’Tutakuwa na Semina kwa Vijana wa eneo la Bahi,Mndemu,Chipanga na Mwitikira kwanza ni kuwapa Elimu juu ya Taasisi yetu na Elimu ya Uraia kwa kupitia hotuba za Baba wa Taifa,’’alisema Lyamunda.

Lyamunda alisema lengo lingine ni kuwapa nafasi Vijana ambao wapo Vijini waweze kuonekana na kupata nafasi ya kucheza timu kubwa kwani Soka kwa sasa limekuwa ni Ajira

CESOPE ni Asasi inayojishughulisha na Utunzaji wa Mazingira na kutoa Elimu ya Uraia  kwa kutafuta suluhisho la kutatua Umaskini na ipo katika Wlaya 3 za Bahi, Manyoni na Chemba.

Wakati huo huo mshambuliaji wa timu ya CDA ‘Watoto wa Nyumbani’Mohammed Neto amesema atahakikisha anaisaidia timu hiyo ili iweze kupanda daraja la kwanza na baadae ligi kuu ya Tanzania Bara.

Neto ambaye katika msimu uliopita wa ligi kuu ya Tanzannia Bara aliitumikia timu ya Mgambo JKT huku katika mchezo dhidi ya Yanga wa raundi ya kwanza akitolewa kwa kadi nyekundu kutokana na kuhisiwa kucheza na kitu chenye ncha kali katika uwanja wa CCM Mkwakwani jijini Tanga

Neto alisema nia yake ni kuisaidia timu yake katika ligi daraja la pili inayotarajiwa kuanza Novemba 22 mwaka huu huku timu hiyo ikikutana na Mvuvumwa ya Kigoma katika uwanja wa Lake Tanganyika.

Alisema kutokana na maandalizi waliyofanya timu hiyo anaamini watairejeshea makali timu hiyo ambayo katika miaka ya nyuma ilikuwa kiboko ya timu za Simba na Yanga.

‘’Kaka tupo hapa na mchezaji mwenzangu  Iddrisa (Rashid) ambaye nae aliichezea Yanga miaka ya nyuma tunataka kuirejesha ligi kuu timu hii kwani tuwachezaji wazuri na mwenyekiti wetu Kaliza (Thadeo)ni mtu wa mpira.

Timu hiyo imepangwa katika kundi A pamoja na Milambo ya Tabora,Singida United ya Singida,Mpanda United ya Mpanda na Ujenzi ya Rukwa huku ikitarajiwa kufungua dimba na Mvuvumwa ya Kigoma Novemba 22 mwaka huu Mkoani Kigoma