KISHINDO CHA TAMASHA LA PASAKA CHANUKIA

NA MWANDISHI WETU

SAFARI ya kuelekea Tamasha la Muziki wa injili la Pasaka litakalofanyika April 17, jijini Dar es Salaam kabla ya kugeukia mikoani, imeanza.

Mkurugenzi wa Kampuni ya Msama Promotions Ltd ya jijini Dar es Salaam inayoratibu tamasha hilo, Alex Msama alisema, kwa sasa wanazidi kujipanga.

“Tunashukuru Mungu, japokuwa tunasubiri kibali cha Basata (Baraza la Sanaa Tanzania), maandalizi ya awali tayari tumeanza,” alisema Msama.

Alisema baada ya kuzinduliwa jijini Dar es Salaam April 16, kivumbi cha shangwe za tamasha hilo kitahamia katika mikoa itakayokuwa imepitishwa na kamati.

“Ingawa Kamati haijaanza rasmi kupokea maombi ya mikoa ambayo ingetaka kufikiwa na tamasha la Pasaka, tayari mikoa kadhaa hadi sasa imeonyesha kulitaka,” alisema.

Msama amedokeza baadhi ya mikoa ambayo imelitaka Tamasha hilo ni Singida, Ruvuma, Iringa, Arusha, Tanga, Shinyanga na Mwanza.

Kuhusu waimbaji, Msama alisema mazungumzo ya awali yameanza na waimbaji wa hapa nchini pamoja na kutoka nje kama Afrika Kusini, Kenya, Rwanda, Uingereza na Nigeria.

Msama alisema pamoja na lengo kuu la tamasha hilo ambalo ni kueneza neno la Mungu, tamasha la mwaka huu litatumika pia kuliombea  taifa na watu wake.

Alisema katika mazingira yalivyo nchini, kuna haja kwa watu wa Mungu kumwombea Rais John Magufuli azidi kumuongoza katika dhamira yake ya kupambana na maovu. 

Tangu kuanziashwa kwa Tamasha la Pasaka mwaka 2000, mbali ya kutumika kuutangaza utukufu wa Mungu, pia likuwa faraja kwa makundi maalumu katika jamii.

Hii ni kutokana na sehemu ya fedha ambazo zimekuwa zikipatikana kupitia viingilio, kutumika kuwafariji walemavu, yatima na wajane kabla ama baada ya kufanyika.