WANUFAIKA WA TASAF KIJIJI CHA KITAGATA WAPONGEZWA KWA KUBORESHA MAISHA YAO NA KUTOA RAMBIRAMBI KWA WAHANGA WA AJALI YA KIVUKO CHA MV. NYERERE

 Waziri wa Nchi, Ofisi ya Rais, Menejimenti ya Utumishi wa Umma na Utawala Bora, Mhe. Kapt (Mst) George H. Mkuchika (Mb) akizungumza na wananchi na wanufaika wa TASAF, kijiji cha Kitagata Wilayani Kasulu alipowatembelea ili kujionea utekelezaji wa Mpango wa Kunusuru Kaya Maskini nchini.

 Baadhi ya wanakijiji na wanufaika wa TASAF wa kijiji cha Kitagata Wilayani Kasulu wakimsikiliza Waziri wa Nchi, Ofisi ya Rais, Menejimenti ya Utumishi wa Umma na Utawala Bora, Mhe. Kapt (Mst) George H. Mkuchika (Mb) (hayupo pichani) alipotembelea kijiji hicho ili kujionea utekelezaji wa Mpango wa Kunusuru Kaya Maskini nchini.

Waziri wa Nchi, Ofisi ya Rais, Menejimenti ya Utumishi wa Umma na Utawala Bora, Mhe. Kapt (Mst) George H. Mkuchika (Mb) akiwa katika picha ya pamoja na watoto wa kijiji cha Kitagata Wilayani Kasulu ambao ni watoto wa mnufaika wa TASAF alipokitembelea kijiji hicho ili kujionea utekelezaji wa Mpango wa Kunusuru Kaya Maskini nchini.

Wanufaika wa Mpango wa Kunusuru Kaya Maskini Kijiji cha Kitagata Wilayani Kasulu wamepongezwa kwa mafanikio waliyoyapata katika utekelezaji wa mpango wa TASAF na kwa kutoa rambirambi ya chakula kwa wahanga waliopotelewa na ndugu, jamaa na marafiki kutokana na ajali ya kuzama kwa kivuko cha MV. Nyerere iliyotokea Septemba 20, 2018.

Pongezi hizo zimetolewa na Waziri wa Nchi, Ofisi ya Rais, Menejimenti ya Utumishi wa Umma na Utawala Bora, Mhe. Kapt (Mst) George H. Mkuchika (Mb) wakati akizungumza na wananchi na wanufaika wa Mpango wa Kunusuru Kaya Maskini katika kijiji cha Kitagata alipowatembelea wanufaika hao kwa lengo la kujionea utekelezaji wa mpango huo.

Mhe. Mkuchika amesema kuwa, wanufaika hao wametumia vizuri fedha za ruzuku kwa kununua vitu mbalimbali ikiwamo vifaa vya shule vya watoto wao, chakula cha familia, bati za kuezekea nyumba zao pamoja na kujenga nyumba bora za kuishi, kufuga na kujiunga na bima ya afya.

Mhe. Mkuchika amesisitiza kuwa, mradi wa TASAF lengo lake ni kupambana na umaskini kwa watanzania wote wanaostahili kunufaika na Mpango wa Kunusuru Kaya Maskini nchini, na kuongeza kuwa, awamu ya tatu ya TASAF imelenga kumuwezesha mwananchi mmoja mmoja tofauti na ilivyokuwa katika TASAF awamu ya kwanza na ya pili ambayo ililenga kujenga zahanati, kutengeneza barabara, kujenga madarasa, vyoo, shule na nyumba za walimu.

Mhe. Mkuchika amefafanua kuwa, Rais wa Jamhuri ya Muungano wa Tanzania, Mhe. Dkt. John Pombe Magufuli anataka ndani ya kipindi cha miaka miwili ijayo, watanzania wote ambao hawana uwezo kiuchumi wawezeshwe kupitia Mpango wa Kunusuru Kaya Maskini.

Aidha, Mhe. Mkuchika amewapongeza wanufaika wa TASAF katika kijiji cha Kitagata wilayani Kasulu kwa kuguswa na maafa yaliyotokana na kuzama kwa kivuko cha MV. Nyerere kisiwani Ukerewe, hivyo kutoa rambirambi ya magunia saba ya chakula aina ya muhogo kwa wahanga wa ajali hiyo.

Mhe. Mkuchika anaendelea na ziara ya kikazi mkoani Kigoma yenye lengo la kuangalia utekelezaji wa Mpango wa Kunusuru Kaya Maskini nchini, ambapo mpaka sasa ameshawatembelea wanufaika katika Manispaa ya Kigoma Ujiji, Halmashauri ya Mji wa Kasulu na Halmashauri ya Wilaya ya Kasulu, ikiwa ni pamoja na kukutana na watumishi wa umma katika Sekretarieti ya Mkoa wa Kigoma, Manispaa ya Kigoma Ujiji, Halmashauri ya Mji wa Kasulu na Halmashauri ya Wilaya ya Kasulu kwa lengo la kuhimiza uwajibikaji na kuboresha Utumishi wa Umma nchini.

IMETOLEWA NA:

KITENGO CHA MAWASILIANO SERIKALINI

OFISI YA RAIS (UTUMISHI)

TAREHE 25 SEPTEMBA, 2018