DC Bahi awaasa wazazi akipokea msaada NMB

Mkuu wa Wilaya ya Bahi Mkoani Dodoma Mwanahamisi Mkunda (wapili toka kushoto) akikata utepe kushiria kupokea rasmi viti na meza vilivyotolewa  msaada  na benki ya NMB kwa ajili ya shule za Sekondari ya Mtitaa na Bahi zilizopo Wilaya ya  Bahi Mkoani Dodoma jana ,msaada huo unathamani ya sh milioni 10. Watatu kulia ni Meneja wa Benki Nmb Kanda ya Kati Nsolo Mlozi na mwenyekiti wa Halmashauri Bahi Danford Chisimo (wa pili kulia) Meneja wa NMB tawi la Bahi Jasmina Tengia (wa kwanza kulia).

 Wanafunzi wa Shule ya sekondari Mtitaa Wilaya ya Bahi Mkoani Dodoma wakiwa kwenye madawati muda mfupi mara baada ya kukabidhiwa rasmi na Benki ya NMB jana.

Mkuu wa Wilaya ya Bahi mkoani Dodoma, Mwanahamisi Mkunda (kushoto), akipeana mkono na Meneja wa Benki NMB Kanda ya Kati, Nsolo Mlozi, ikiwa ni ishira ya kukabidhiwa viti na meza 50 pamoja na viti 71 vya maabara kwa ajili ya Shule ya Sekondari Mtitaa na Bahi, makabidhiano hayo yalifanyika shule ya sekondari Mtitaa jana. (Na Mpiga Picha Wetu).

 

NA MWANDISHI WETU

WAZAZI na walezi wilyanai Bahi mkoani Dodoma, wametakiwa kuunga mkono juhudi za Serikali ya awamu tano chini ya Rais John Magufuli kwa kuchangia vifaa vya shule ili kuondoa changamoto zinazoikabili sekta ya elimu nchini.

Hayo yamelezwa na Mkuu wa Wilaya ya Bahi (DC), Mwanahamisi Mkunda, wakati alipozungumza kwenye makabidhiano ya msaada wa viti na meza kutoka Benki ya NMB, yaliyofanyika katika viunga vya Shule ya Sekondari ya Mtitaa, Wilayani Bahi.

DC Mkunda aliwataka wazazi na walezi kupambana kadri wawezavyo kuhakikisha wanaisaidia Serikali kuchangia baadhi ya vifaa vya elimu ili kupunguza changamoto ya vifaa hivyo.

“Mkiaambiwa elimu bure, msifikiri kila kitu ni bure kuna baadhi ya vifaa wazazi mnatakiwa kuchangia, haiwezekani hata dawati Serikali ifanye pekee yake,” alisema.

Mkunda alivitaja baadhi ya vifaa vya elimu wanavyotakiwa kuchangia wanachi na jamii kwa ujumla kuwa ni madawati, vitabu, madaftari na vingine ambavyo vinatumika katika kutoa elimu, ambalo ni jukumu lao kujitolea.

Aidha alitoa muda wa miezi mitatu kwa wakazi wa  Kata ya Mtitaa wilayani haumo kuhakikisha wanamaliza changamoto ya viti na meza vilivyobaki.

Naye Mkuu wa Shule ya Sekondari ya Mtitaa, Selemani Mbiaji, aliishukuru Benki ya NMB kwa msaada waliotoa kwa ajili ya shule hiyo na kuahidi kuvitunza vifaa hivyo.

Mbiaji alisema shule hiyo ina jumla ya wanafunzi 332 na idadi ya viti na meza vilivyopo ni 201, hivyo baada ya msaada huo kutoka NMB, wataendelea kuwa na upungufu wa viti 131.

Kwa upande wake, Meneja wa NMB Kanda ya Kati, Nsolo Mlozi, alisema msaada huo waliokabidhi una thamani ya Shilingi milioni 10, huku akivitaja vifaa walivyokabidhi kwa shule mbili za Sekondari za Mtitaa na Bahi, kuwa ni viti na meza 51 na viti maalumu 71 vya kutumika kwenye maabara.

Mlozi alisema lengo la NMB hiyo kutoa msaada huo ni kuunga mkono juhusi za Serikali ya awamu ya tano katika kuhudumia jamii kwa kutenga asilimia moja ya faida inayopata kwa mwaka.