NEMC yatoa elimu maonyesho ya 77

Mhasibu wa wa Baraza la Taifa la Hifadhi na Usimamizi wa Mazingira (NEMC) Bwana Beatrice Kilimo (wapili kushoto), akitoa elimu juu ya utunzaji wa mazingira kwa mwananchi (kulia) aliyetembelea banda la baraza hilo katika maonesho ya 43 ya biashara ya kimataifa jijini Dar es Salaam. Kushoto ni Afisa Mazingira Mwandamizi wa NEMC, Bi. Pendo Kundya.

Mkaguzi wa Mazingira wa Baraza la Taifa la Hifadhi na Usimamizi wa Mazingira (NEMC), Bwana Nelson Nyabise (kulia) akitoa elimu juu ya utunzaji wa mazingira kwa mwananchi aliyetembelea banda la baraza hilo katika Maonesho ya 43 ya Biashara ya Kimataifa jijini Dar es Salaam.

Na Mwandishi Wetu, Dar es Salaam

Baraza la Taifa la Hifadhi na Usimamizi wa Mazingira (NEMC) limeendelea kutoa elimu kwa wananchi juu ya utunzaji wa mazingira, kutoa huduma za ulipaji watozo za tathmini ya athari kwa mazingira (EIA), Ukaguzi wa mazingira (EA) pamoja na masuala mbalimbali yanayohusu mazingira.

NEMC imeshiriki katika maonesho ya 43 ya biashara ya kimataifa maarufu sabasaba wakishiriki katika Banda la Katavi chumba namba 53 na 54 kwa madhumuni ya kuuhabarisha umma juu ya majukumu yake katika swala la mazingira.

Akizungumza na waandishi wa habari jana katika maonesho hayo yanayoendelea jijini Dar es Salaam, Afisa Mazingira Mwandamizi wa NEMC, Bi. Pendo Kundya alisema kuwa dhumuni la NEMC kuwepo katika viwanja hivyo ni kutoa elimu ili kujenga uelewa mpana kwa wananchi juu ya umuhimu utunzaji mazingira.

“Mudhumini letu ni kuendelea kuuhabarisha umma juu ya utunzaji wa mazingira na pia kuhamasisha juu ya katazo la Serikali la matumizi ya mifuko ya plastiki na kutumia mifuko mbadala iliyothibishwa na mamlaka husika kutumiwa na jamii,” alisema

Aidha Bi Kundya aliongeza kuwa mazingira ni muhimu yakatunzwa ili athari zitokanazo na uharibifu wa mazingira usituathiri kama nchini kwa kujijengea mazoea ya kufanya usafi katika mazingira yanayotuzunguka.

“Katika banda hilo NEMC wanatoa huduma mbalimbali ikiwemo kupokea tozo za EIA pamoja na EA kwa mwaka 2019//2020 kwa wadau ambao hawajalipa,”Bi.Kundya alisema.

Alisema Baraza liimesogeza huduma za malipo ya tozo za EIA na EA ili wadau wa mazingira  waweze kuzilipia hapa kwani katika maonesho haya wadau wengi hujitokeza ili kupata maelezo ya mambo mbalimbali yanayofanywa na kampuni au taasisi mbalimbali za ndani nan je ya nchi.

Kwa upande wake Mkaguzi wa Mazingira wa NEMC Bwana Nelson Nyabise alisema  NEMC wanaendelea kutoa elimu na mwongozo kwa wadau wa mazingira ambao hufanya shughuli za ukusanyaji,utunzaji na usafirishaji wa  taka hatarishi kama betri chakavu, taka za kieletronic  na oil chafu ili zisiweze kuleta madhara kwa wananchi.

“Athari za taka hatarishi ni hatari kwa ustawi wa mazingira hivyo katika banda letu tunaendelea kutoa elimu kuhusu namna nzuri ya kukusanya, kuhifadhi na kusafirisha taka hatarishi ili zisilete madhara kwa wananchi,’ alisema Bw. Nyabise

Naye Afisa Mazingira wa NEMC, Bwana Elias Chundu alipongeza mwitikio wa watanzania katika kufuatilia masuala mbalimbali yanayohusu mazingira huku wengine wakitoa maoni ambayo Baraza imeahidi kuyafanyia kazi

“Kumekuwa na mwitikio mkubwa kwa watanzania katika kufuatilia masuala yanayohusu mazingira na hasa mkikumbuka hivi karibuni kulikuwa na marufuku ya utumiaji wa mifuko ya plastiki ambapo walitii marufuku hiyo pasipo  kutumia nguvu,” alisema Bw. Chundu.

Wananchi kadhaa waliotembelea banda hilo walitoa pongezi kwa Baraza hilo katika kusimamia sheria na kanuni za mazingira na kutoa wito kuendelea kutoa elimu kupitia vyombo vya habari juu ya umuhimu wa utunzaji wa mazingira.

“NEMC inafanya kazi nzuri kuhakikisha elimu ya utunzaji wa mazingira inawafikia mwananchi wote na nimefurahi kuwakuta katika maonesho haya, hii inaonyesha ni namna gani wamejipanga katika kutoa elimu kwa wananchi juu ya mazingira,” alisema Bi Mary Joshua.alipotembelea banda la NEMC.

Alisema zipo baadhi ya changamoto wanazotakiwa kuzifanyia kazi  kama NEMC ikiwa ni pamoja na tatizo la kelele zinazotoka katika baa, kumbi za starehe na ibada za mikesha ambapo  zinawaathiri wananchi wengi.

NEMC wameendelea kuungwa mkono na wananchi na wadau mbalimbali wa ndani na nje ya nchi kwa hatua wanazochukua ikiwemo upigaji marufuku wa matumizi ya mifuko ya plastiki.