SHIRIKA LA POSTA LAJA NA DUKA LA KIMTANDAO

Na Tatu Mohamed

KATIKA kuendana na soko la ushindani, Shirika la Posta Tanzania, limeanzisha duka jipya la biashara za kimtandao maarufu kama 'Posta Shop Tz'.

Akizungumza na Habari Mseto leo Julai 2, 2019 katika viwanja vya maonesho ya 43 ya kimataifa ya biashara ya Dar es salaam (DITF) yanayofanyika katika viwanja vya Mwalimu Julius Nyerere, Meneja wa Biashara za kielekroniki(E-commerce), Amina Salum (pichani), amesema ni duka ambalo linauwezo wa kuuza, kununua na kutangaza biashara kwa wateja ambao wamejisajili.

"Mjasiliamali yeyote anaweza kujiunga kupitia website yetu ya www.postashoptz au kuingia kwenye website ya shirika ya www.posta.co.tz," amesema.

Amesema wameamua kuanzisha hivyo kwasababu biashara za kimtandao kwasasa zinauzika sana.

"Vijana wengi sasa hivi wananunua bidhaa online, kwa kuwa shirika linafanya biashara na linaaminika zaidi hivyo tukaona na sisi tuje na duka hili ambapo mtu yeyote anaweza kujiunga nasi bure kabisa " amesema Amina.

Hata hivyo aliongeza kuwa muamko umekuwa mkubwa kwa watanzania kutembelea banda lao na kutaka kujifunza mambo mbalimbali ya shirika hilo.

Ameongeza kuwa shirika hilo wamejipanga kama ambavyo kampuni zingine zimejipanga na wanafanya kazi na kampuni zote za simu nchini.