NMB kutoa huduma kamili ya benki Sabasaba

*Yatangaza neema kwa wachakataji mazao kukuza uchumi wa viwanda

Na Mwandishi Wetu

BENKI ya NMB PLC, imetoa wito kwa Watanzania kutembelea Maonyesho ya Kimataifa ya Biashara ya Dar es Salaam (Saba Saba) ili kufungua akaunti za papo hapo kwenye banda lao.

Katika kuhakikisha benki hiyo inaimarisha huduma zake za kifedha, imewahimiza watakaotembelea banda lao wawe na vitambulisho ili wafungue akaunti za papo hapo na kuwa sehemu ya mabadiliko ya kiuchumi nchini.

Kwa mujibu wa taarifa iliyotolewa jana kwa waandishi wa habari, Meneja wa NMB Kanda ya Dar es Salaam, Badru Idd alisema wameamua kutoa huduma maalum na bora kwa wale watakaotembelea maonyesho hayo yaliyoanza leo.

"Tutafungua akaunti ya chapchap, Akaunti ya Mtoto, Akaunti ya Chipukizi na Akaunti ya Mwanachuo hapahapa Sabasaba, ninatoa wito wa Watanzania kutumia jukwaa hili kufurahia benki nzuri na rahisi na Benki ya NMB," alisema Badru.

Aidha, Benki hiyo imegeuza viwanja vya Sabasaba kama tawi la benki kwa wateja wao ambapo huduma zote za kibenki zitatolewa, wataweka, watatoa, huduma za ATM, NMB Wakala, ikiwa ni pamoja na huduma za fedha za kigeni.

Badru alibainsha: "Huduma zinazopatikana katika SabaSaba zinawahakikishia wateja kuwa si lazima kubeba fedha nyingi kwa ajili ya ununuzi ambao ni hatari kwa usalama; badala yake wateja wanaweza kutoa fedha wakati wowote kutoka katika huduma zetu za ATM zilizo na vifaa vizuri au NMB Wakala."

Katika hatua nyingine, Badru alisema ili kuendana na kaulimbiu ya maonyesho hayo kwa mwaka huu ‘Usindikaji wa mazao ya kilimo kwa maendeleo endelevu,’ NMB wameamua kutoa huduma maalumu kwa kuonyesha bidhaa na huduma zinazotoa msaada mkubwa katika biashara ya kilimo ambayo ni muhimu kufikia ajenda ya viwanda.

Kwa upande wake Meneja Mwandamizi Benki ya NMB Idara ya Kilimo Biashara, Isaac Masusu alisema, benki hiyo imeanzisha utaratibu wa kusaidia wataalamu wa kilimo kwa kutoa ufadhili wa kilimo nchi nzima.

"Tunao mtandao mkubwa wa matawi ambayo huimarisha lengo la Kilimo, tumeunga mkono sekta ya kilimo kwa kutoa fedha jumla ya Sh Bilioni 450 hadi sasa, pia tumewezesha mashirika zaidi ya 300 ya Wakulima na bidhaa zitokanazo na mazao shambani, ikiwemo mashine kwa shughuli za viwanda vya kuchakata mazao ya chakula,” alisema Masusu.

Wakati huo huo, NMB imewawezesha wakulima zaidi ya 200,000 kupata huduma za kifedha,katika maeneo ambayo awali hayakuwa na huduma hiyo hali iliyowasababisha watembee umbali mrefu.