MIZANI YA KUPIMIA MADINI NA VITO VYA THAMANI KUHAKIKIWA

Meneja WMA Pwani, Alban Kihulla, akizungumza na waandishi wa habari walipotembela katika banda lao lililopo kwenye Maonesho ya 43 ya Biashara ya Kimataifa Dar es Salaam (DITF) maarufu sabasaba yanayoendelea kwenye viwanja vya mwalimu Nyerere, barabara ya Kilwa jijini Dar es Salaam. 
 

Na Tatu Mohamed, Dar es Salaam

KATIKA kuendelea kuisapoti serikali katika sekta ya madini, Wakala wa Vipimo (WMA) imesema tayari imehakiki mizani inayotumika kupimia Madini na Vito vya thamani na migodini nchi nzima.

Hayo yamebainishwa na Meneja WMA Pwani, Alban Kihulla alipokuwa akizungumza na Habari Mseto katika banda lao lililopo kwenye maonesho ya 43 ya biashara ya Kimataifa Dar es Salaam (DITF) maarufu sabasaba yanayoendelea kwenye viwanja vya mwalimu Nyerere, barabara ya Kilwa jijini Dar es Salaam. 

Amesema uhakiki huo ni miongoni mwa kuisaidia serikali katika sekta ya madini ili kusaidia mnunuaji kupata kiasi kamili anachokihitaji.

"Wakala wa vipimo inahakiki mizani inayotumika kununulia madini na vito vya thamani na migodini, katika masoko ya kuuzia madini na kwa wauzaji wa madini(sonara). Pia tunatoa ushauri wa kitaalamu kwa Wizara inayohusika na madini mara kwa mara inapohitajika.

"Kwa Tanzania bara hakuna mzani usiohakikiwa katika upimaji wa madini kwani WMA tuna vifaa maalum vya kupimia mizani hiyo," amesema.

Amesema hiyo inasaidia hata kwa wachimbaji wadogo wanaouza madini katika vituo mbalimbali nchini kuuza kitu kamili ambacho yeye hawezi kupata hasara wala mteja kwa sababu kimepimwa katika mzani uliohakikiwa. 

Aidha, Kihulla amesema tayari WMA imekagua dira za maji zipatazo 57000 kwa kipindi cha Februali mwaka huu na kukuta dira 500 hazipo sawa katika usomaji wa maji.

Ameongeza kuwa, mwaka huu katika maonyesho hayo wamekuja na bidhaa mbili za kuonyesha ikiwemo Dira ya maji pamoja na mizani ya kupimia Vito.