HALMASHAURI ZATAKIWA KUHARAKISHA UPIMAJI WA MAENEO NA MASHAMBA YA WANANCHI

NA TIGANYA VINCENT, TABORA

SERIKALI imeziagiza Halmashauri za Wilaya, Miji na Manispaa kuhakikisha zinaharakisha zoezi la upimaji wa maeneo na mashamba ya wananchi ili waweze kuwapatia hati miliki za maeneo yao.

Agizo hilo limetolewa jana na Naibu Waziri wa Ardhi, Nyumba na Maendeleo ya Makazi Angelina Mabula wakati wa ziara yake katika Wilaya ya Uyui na Nzega mkoani Tabora.

Alisema hatua hiyo itasaidia kuondoa migogoro baina yao hata Taasisi nyingine za umma na binafsi kutokana na kukosekana kwa alama zinazoonyesha mipaka ya maeneo.

Mabula alisema sanjari na upimaji wa maeneo na mashamba ya wananchi ni vema kuwepo na mpango bora wa matumizi ya ardhi katika vijiji vyote ili kuzuia ujenzi wa makazi holela.

Aidha alizitaka Halmashauri zote kuhakikisha zinanunua maeneo ya kutosha kwa ajili ya shughuli mbalimbali za maendeleo ikiwemo kutenga maeneo ya ujenzi wa viwanda na huduma nyingine za kijamii kama vile shule na Hospitali.

“Nunueni maeneo ya kutosha na kuyapima …ili anapotokea Mwekezaji ni rahisi kuingia naye ubia…pia hakikishe kila eneo la umma linapimwa na kupata hati ili kuepuka maeneo ya umma kuvamiwa” alisema.

Naibu Waziri huyo alisema ununuaji huo wa maeneo ni lazima uzingatia Sheria na makubaliano ya pande mbili ya mnunuzi na muuzaji.

Mabula alisema eneo la mtu lisichukuliwe kabla ya kumlipa fidia anayopaswa kulipwa.

Katika hatua nyingine Naibu Waziri huyo amewataka Wananchi waliouziwa viwanja kuviendelea la sivyo vitachukuliwa na kuuziwa wengine.

Alisema kuna baadhi ya wananchi wanauziwa viwanja lakini wanakaa wanavyo kwa kipindi hata cha miaka mingi bila kufanya chochote jambo ambalo ni kinyume cha Sheria.