Mkurugenzi TOSCI kuongoza kamati UPOV

Mkurugenzi Mkuu wa Taasisi ya Kudhibiti Ubora wa Mbegu Tanzania (TOSCI), Patrick Ngwediagi (kushoto), Msajili wa Hakimiliki za Wagunduzi wa Aina Mpya za Mbegu za Mimea Tanzania Bara, Twalib Njohole na Msajili wa Hakimiliki za Wagunduzi wa Aina Mpya za Mbegu za Mimea Zanzibar, Asia Filfil Thani, wakifuatilia Mkutano wa Taasisi ya Kimataifa ya Hakimili za Wagunduzi wa Aina Mpya za Mbegu za Mimea (UPOV) nchini Uswis. (Na Mpiga Picha Maalum). 

 

NA SULEIMAN MSUYA

MKURUGENZI Mkuu wa Taasisi ya Kudhibiti Ubora wa Mbegu nchini Tanzania (TOSCI), Dk. Patrick Ngwediagi amechaguliwa kuwa Mwenyekiti wa Kamati ya Utawala na Sheria (CAJ) ambayo ni Kamati Tendaji ya Taasisi ya Kimataifa ya Hakimiliki za Wagunduzi wa Aina Mpya za Mbegu za Mimea (UPOV).

Akizungumzia uteuzi huo Dk. Ngwediagi alisema unatokana na mchango wake kama mwakilishi wa Tanzania kwenye Baraza la UPOV na ushiriki makini wa Tanzania katika shughuli na kazi mbali mbali za ulinzi wa hakimiliki.

Alitolea mfano usimamizi wa mashirikiano katika masuala ya hakimiliki katika nchi za Jumuiya ya Maendeleo Kusini mwa Afrika (SADC) na Afrika Mashariki ni sababu moja wapo ilisababisha kuchaguliwa.

Alisema Tanzania imekuwa na mchango mkubwa katika masuala ya hakimiliki hivyo ni imani yake hiyo imekuwa sababu ya kuchaguliwa na kuahidi kuwa ataitendekea haki nafasi hiyo.

“Hii ni taasisi iliyoundwa na Serikali za nchi wanachama kusimamia na kuratibu taratibu za utoaji na ulinzi wa hakimiliki za wagunduzi wa aina mpya za mbegu nashukuru kupata nafasi hii nitahakikisha siiangushi nchini na Afrika kwa ujumla,” alisema.

Alisema nafasi hiyo ameipata baada ya kupendekezwa na kuungwa mkono na nchi kutoka mabara yote kabla ya kuchaguliwa rasmi na Baraza Kuu la UPOV.

Dk.Ngwediagi alisema katika kipindi cha miaka mitatu ya Uenyekiti wake, atahakikisha kuwa UPOV inafanya maamuzi yanayoendeleza sekta ya kilimo kwa Tanzania, Afrika na kimataifa.

“Nitahakikisha Tanzania na nchi zingine za Afrika zinanufaika na ujuzi na uzoefu mkubwa uliopo duniani katika masuala ya utoaji wa hakimiliki kwa wagunduzi wabegu na katika sekta nzima ya kilimo.

Tayari nimekwisha anza kufanya majadiliano na baadhi ya nchi kama Uholanzi ambao wamepiga hatua kubwa sana katika eneo hili pamoja na sekta nzima ya kilimo,” alisema.

Alisema majadiliano hayo yanaonesha yatazaa matunda hivi karibuni ambapo pamoja na mambo mengine wataalam wetu watapata nafasi zaidi ya kujifunza jinsi wenzetu wanavyotumia na  walivyonufaika na uwepo wa hakimiliki katika utafiti na ubunifu.

Aidha, alifafanua hakimili inayotolewa kwa mgunduzi au mbunifu huwashawishi na kuwahamasisha wagunduzi watafiti (breeders) kuendelea kufanya utafiti zaidi kwa umakini na ubunifu zaidi kwa imani kuwa ubunifu wao hautatumiwa kinyume na matarajio bila kumshirikisha mgunduzi.

Alisema katika kuhakikishiwa ulinzi na heshima hiyo ndani na nje ya nchi, wanatoa mbegu bora zaidi zinazohimili mazingira mbalimbali ikiwemo mabadiliko ya tabianchi na hivyo kuwasaidia wakulima kuongeza mavuno, tija na kipato.

Aidha alisema uwepo wa mbegu zilizotafitiwa vyema na kwa ubunifu mkubwa huwezesha mbegu kupatikana kwa wingi na kwa bei nafuu.

“Kwa ufupi hakimiliki ni moja ya mazingira muhimu katika kuimarisha uwekezaji wa kilimo,” alisema.