RC KAGERA ATOA SIKU 4 KWA WATUMISHI NA TAASISI KUREJESHA FEDHA ZA WAKULIMA

Mkuu wa Mkoa wa Kagera Brigedia Generali Marco Elisha Gaguti,  akizungumza  na viongozi wa Chama Kikuu cha Ushirika Mkoa  wa Kagera (KCU).

 Na Lydia Lugakila, Kagera

 

Mkuu wa Mkoa wa Kagera Brigedia Generali Marco Elisha Gaguti amewataka watumishi na taasisi zilizokopa fedha  katika Benki ya wakulima ambayo ilifungwa kuhakikisha wanarejesha fedha hizo ndani ya siku 4.

Akizungumza   na viongozi wa Chama Kikuu cha Ushirika Mkoa  wa Kagera KCU, Chama kikuu cha ushirika wilaya ya Karagwe na kyerwa  KDCU amesema amefuatilia na kukuta zaidi ya shilingi bilioni 2 hazijarejeshwa bado zimo mikononi mwa watumishi na taasisi hizo.

Brigedia Gaguti amesema kukopeshwa kwa fedha hizo bila kufuata utaratibu ndo kulisababisha benki hiyo kufungwa na hivyo kuwataka watumishi hao kutambua kuwa fedha hizo ni za wakulima.

Amesema kuwa atakayeshindwa kurejesha fedha hizo ndani ya siku 4 anatakiwa kujisalimisha kwenye kamati ya ulinzi na usamalama ya mkoa vinginevyo hatua kali za kisheria zitaanza kuchukuliwa dhidi yao.

‘’Wapo walioikopa na kusababisha benki hiyo  ikafilisiwa hadi ikafungwa fedha hizo lazima zirudi nimefatilia nimeona wako watendaji wanaendelea na maisha kama kawaida zimo taasisi zinaedelea na maisha kama kawaida huku fedha zilizokuwa za  wakulima hazieleweki zilipo’’alisema Brigedia Gaguti.

Katika hatua nyingine mkuu huyo wa mkoa amewataka viongozi wa vyama hiyo kuhakikisha ndani ya mwezi mmoja  wanapmatia taarifa kuhusu namna ya rasilimali za vyama hivyo zinavytumika na namna zinavyowanufaisha wakulima .