BASHUNGWA AWATAKA WAKANDARASI KUZITUMIA BENKI KUPATA MIKOPO

Waziri wa Viwanda na Biashara, Innocent Bashungwa, akipokelewa na Ofisa Biashara Mkuu wa Benki ya CRDB, Dk. Jsoeph Witts, alipowasili katika Kongamano la Uwezeshaji kwa Wakandarasi na Wazabuni kwa mikoa ya Shinyanga, Geita, Kigoma na Tabora lililoandaliwa na benki hiyo mjini Shinyanga. (Na Mpiga Wetu).

Na Mwandishi Wetu, Shinyanga

 

WAZIRI wa Viwanda na Biashara Innocent Bashungwa amewataka wakandarasi kutumia benki kuchukua mikopo ili kuwawezesha kukamilisha miradi yao kwa wakati na kuacha kutegemea malipo ya awali ya mradi husika ambazo zimekuwa zikichelewa na kufanya miradi kutokamilika kwa wakati.

Ameyasema hayo leo wakati akizungumza katika kongamano lililoandaliwa na Benki ya CRDB kwa ajili ya wakandarasi ,wazabuni  na wafanyabishara wa mikoa ya Shinyanga, Geita, Tabora na Kigoma.

Kongamano hilo lililenga kuwapatia washiriki hao elimu juu ya matumizi sahihi ya fedha za mikopo wanazozichukua kwa ajili ya kutekeleza miradi mbalimbali.

Bashungwa amesema wakandarasi ni sekta muhimu sana katika ujenzi wa miradi mbalimbali ya maendeleo hapa nchini hivyo wanapaswa kuboresha utendaji  kazi wao kwa kuchukua mikopo toka taasisi za fedha na mabenki.

Ameongeza kuwa, changamoto kubwa inayowakabili wakandarasi wengi ni ukosefu wa mitaji kwa ajili ya kuendesha miradi mbalimbali ambapo changamoto hiyo huchangia kutomalizika kwa miradi kwa wakati.

“Benki ya CRDB imewaletea fursa mlangoni, itumieni vilivyo, changamkieni fursa hizo ili muweze kukuza biashara zenu na kupata faida zaidi, kuongeza ajira kwa vijana wetu na hatimaye kulipa kodi stahiki za serikali.

“Ni matarajio yangu kuwa, baada ya kongamano hili tutaona utofauti kubwa kutoka kwa wakandarasi na halmashauri ambao wamekuwa wakipitia changamoto katika kukamilisha miradi yao, kutokana na suala la mapato na ukwasi” alisema Bashungwa.

Bashungwa aliipongeza Benki ya CRDB kwa kuwa mstari wa mbele katika kuunga mkono juhudi za serikali katika ujenzi wa miondombinu mbalimbali ambayo itasadia kuchochea ukuaji wa uchumi.

“Benki ya CRDB  inafadhili miradi mbalimbali ya kimkakati inayotekelezwa na Serikali ya Awamu ya Tano katika jitihda zake za kuifanya Tanzania kuwa nchi ya viwanda na wanatambua na kuthamini ushikiri wa benki hiyo katika utekelezaji wa miradi ya maendeleo kama vile Mradi wa Ujenzi wa Reli ya Kisasa (SGR), Mradi wa Umeme wa Maji katika Bonde la Mto Rufiji (Nyerere Hydro Power Project) na ule wa kusambaza nishati ya umeme vijijini  (REA).

“Kipekee kabisa niwapongeze tena Benki ya CRDB kwa utayari wenu, ambao mmekuwa mkiuonesha katika kuisaidia Serikali, hususani katika utekelezaji wa miradii mikubwa ya kimkakati,” alisema  Bashungwa.

Mkuu wa Mkoa wa Tabora ambaye pia ni Mwenyekiti wa Wakuu wa Mikoa ya Kanda Ziwa,Aggrey Mwanri aliwahamasisha  wakandarasi na wazabuni wa miradi ya maendeleo katika mikoa ya kanda hiyo ya magharibi kuchangamia fursa zinazotolewa na Benki ya CRDB, ili kwa kushirikiana na serikali waweze kufikia lengo la kuimarisha miundombinu nchini.

Awali, Afisa Mkuu wa Biashara wa Benki ya CRDB Dk. Joseph Witts amesema kongamano hili ni fursa pekee ya kuwakutanisha wakandarasi,  wazabuni na wafanyabisahra  ili kuwajengea uwezo na kuwajulisha fursa mbalimbali za kifedha zilizomo ndani ya benki ya CRDB, na namna ya kuzitumia fursa hizo ili kukuza miradi na biashara zao.

“Tuna bidhaa nyingi mahususi kwa ajili ya kundi hili la wateja ikiwamo Purchase Order Financing, Contract financing, and Invoice Discounting ambazo hazihitaji dhamana yoyote kutoka kwa Mkandarasi au mzabuni pindi anapotaka kukopa.

“Zaidi ya hilo, Benki pia hutoa mikopo kwa ajili ya upatikanaji wa vifaa vya ujenzi, magari, mashine, Mabasi na  huduma nyingine kama vile dhamana ya malipo ya awali (Advance Payment Guarantee), dhamana ya Utekelezaji wa Miradi (Performance Guarantee), Barua za Mikopo (Letters of Credit), Huduma za Bima na pia tunatoa mikopo ya muda mfupi kama  mitaji ya kufanyia kazi” alisema Dk. Witts.

Akizungumza kwa niaba ya Wakandarasi hao,Mkurugenzi Mtendaji wa Kampuni ya ukandarasi ya Junior Construction Ltd na Mbunge wa Jimbo la Kishapu Suleiman Nchambi aliipongeza Benki ya CRDB kwa hatua hiyo ya kuwakutanisha wadau wa sekta ya ujenzi nchini huku wakieleza fursa zinazotolewa na Benki ya CRDB zitakwenda kuleta sura mpya katika utekelezaji wa miradi ya miundombinu nchini.