MASHINDANO YA TAIFA YA RIADHA NGORONGORO CRATER 2019

MAANDALIZI ya Mashindano ya Taifa ya Riadha mwaka 2019 yanayotarajiwa kufanyika jijini Mwanza katika Chuo cha Elimu ya Taifa Butimba, yanaendelea vema.

 

Mashindano hayo ambayo mwaka huu yatajulikana kama Ngorongoro Crater National Athletics Championship 2019 yatafanyika tarehe 28 na 29 Desemba yakishirikisha mikoa yote ya Tanzania Bara na Visiwani.

Shirikisho la Riadha Tanzania (RT), likitambua michango na uwezeshaji wa wadau mbalimbali katika sekta ya michezo hususan Riadha, pia likitambua wajibu wa michezo hususan Riadha katika kuchangia maendeleo ya Taifa ikiwamo kuitangaza nchi na vivutio vyake, limeamua mashindano ya mwaka huu yajulikane kama ‘Mashindano ya Riadha ya Taifa ya Ngorongoro Crater 2019’ hasa tukiheshimu ushirikiano na sapoti kubwa iliyofanywa na Mamlaka ya Hifadhi ya Bonde la Ngorongoro (NCCA), katika kalenda ya RT 2019 inayokwenda kumalizika mwaka huu.

Katika kalenda hii inayokwenda kumalizika, NCCA imetoa mchango kubwa katika kufanikisha Mashindano ya Nyika ya Taifa 2019 yaliyofanyika mjini Moshi Kilimanjaro, ushiriki wa Tanzania katika mashindano ya Nyika ya Dunia huko Aarhus nchini Denmark, Mashindano ya Wazi ya Taifa 2018 yaliyofanyika jijini Arusha na matukio mengine mbalimbali. RT tunawashukuru na kuwaomba wazidi kuendeleza ushirikiano na RT pia tunawakaribisha wadau wengine wenye mapenzi mema na maendeleo ya Taifa la Tanzania hususan katika sekta ya michezo, tutawapa ushirikiano wa kutosha.

Mikoa inatakiwa kuendelea kuwasiliana na Ofisi ya RT kwa maelekezo zaidi endapo kuna jambo wanahitaji  ufafanuzi na timu zinatakiwa kuwasili jijini Mwanza Desemba 27 mwaka huu.

Maelezo zaidi kuhusu michezo itakayochezwa, idadi ya washiriki kwa kila mkoa, imetumwa kwa makatibu wa mikoa yote na tunaomba izingatiwe.

Mashindano ya Taifa ya mwaka huu yana umuhimu wa kipekee hasa ikizingatiwa hivi sasa tunakwenda katika mashindano mbalimbali ya kimataifa hususan Mashindano ya Dunia U 20 Nairobi Kenya, Olimpiki Tokyo 2020 na mengineyo, hivyo yatatoa nafasi kwa vipaji vipya kuonekana na pia wachezaji kuonyesha viwango vyao walivyo navyo hivi sasa, hivyo Shirikisho kuwa na ‘Active Data Base’ ya viwango vya wachezaji mbalimbali nchini na kuirahisishia Kamati ya Ufundi katika utendaji wake kuelekea matukio hayo ya kimataifa. 

Hivyo tunasisitiza mikoa iwape nafasi wachezaji wao kuonyesha viwango vyao walivyo navyo hivi sasa.

UCHAGUZI KAMISHENI YA WANARIADHA

Katika utekelezaji wa matakwa ya Kikatiba, Kamisheni ya Wanariadha inapaswa kufanya uchaguzi wake mkuu sambamba na mashindano ya Taifa mwaka huu baada ya kipindi chao cha uongozi kupita.

Hivyo Kamisheni ya Wanariadha itafanya uchaguzi wake Desemba 29 jijini Mwanza mara baada ya kumalizika mashindano ya Taifa. Hivyo Wachezaji ‘Active’ wenye nia ya kugombea watume maombi yao RT.

Nafasi zitakazogombewa ni Mwenyekiti, Katibu Mkuu na Wajumbe wawili wanaume na Wajumbe wawili wanawake.

IMETOLEWA NA

IDARA YA HABARI NA MAWASILIANO –RT

DESEMBA 24, 2019