MANISPAA YA TABORA IMETOA MIKOPO YA MILIONI 190 KWA VIKUNDI 36

NA TIGANYA VINCENT

HALMASHAURI ya Manispaa ya Tabora imefanikiwa kutoa mikopo ya jumla ya shilingi milioni 190 kwa vikundi 36.

Fedha hizo zimetolewa hadi kufikia Desemba mwaka jana ikiwa ni sehemu ya mikopo ya asilimia 10 inayotokana na mapato yake ya ndani.

Taarifa hiyo imetolewa leo na Mchumi wa Manispaa ya Tabora Joseph Kashushura wakati kikao cha Maalumu wa kupitia makisio ya mapato na matumizi ya Bajeti wa Baraza la Madiwani ya Manispa.

Alisema kati ya fedha hizo shilingi milioni 115 zimetolewa kwa vikundi 23 vya wakina mama , milioni 55 zimetolewa kwa vikundi 9 vya vijana na milioni 20 zimetolewa kwa vikundi vinne(4) vya walemavu.

Katika hatua nyingine  Kashushura alisema kuwa Halmashauri ya Manispaa ya Tabora imefanikiwa kupeleka kiasi cha milioni 119.4 katika Kata 19 ili kutekeleza miradi ya maendeleo.

Wakati huo huo Kashushula amesema kuwa Halmashauri hiyo imepokea Jumla ya shilingi milioni 899.2 ambazo zimetumika katika ukarabati wa miundombinu ya Shule ya Sekondari ya Kazima.

Alizitaja kazi zilizofanyika ni ukarabati wa vyumba 6 vilivyokuwa vimeungua , ukarabati wa bweni la wasichana na bweni la wavulana, ukarabati wa vyumba 6 vya block Na .1 na ukarabati vya vyoo vya walimu na wanafunzi.

Kashushura aliongeza kazi nyingine ni ukarabati wa mfumo wa maji taka,  ukarabati wa darasa la walemavu, ukarabati wa vyumba vya block 23, ukarabati wa maabara ya kemia, bailojia, , fizikia, ukarabati wa karakana ili liwe bweni la wasichana.

Aliongeza kuwa Manispaa ya Tabora imepokea jumla ya milioni 522 kwa ajili ya ukarabati wa miundombinu ya Shule ya Sekondari Milambo.

Kashushura alisema ukarabati huo umehusisha ukarabati wa madarasa, jengo la utawala, vyoo, maabara na jengo la chakula.