Mashindano ya kuogelea ya Taliss kufanyika mwezi ujao

 Mohamedduwaid Abdullathif.

 Nawal Shebe.

 

Na Mwandishi Wetu

Dar es Salaam. Mashindano ya kuogelea ya Taliss-IST yamepangwa kufanyika kuanzia Februari 22 mpaka 23 kwenye bwawa la kisasa la Shule ya Kimataifa ya Tanganyika (IST) Masaki.

Mashindano haya yanatarajiwa kushirikisha waogeleaji kutoka klabu zote za Tanzania Bara na Zanzibar kwa mujibu wa Meneja wa klabu ya Taliss-IST, Hadija Shebe.

Hadija alisema kuwa wanatarajia kuwa na mashindano yenye ushindani mkubwa kutokana na maandalizi ambayo klabu mbali mbali yameanza kufanya mpaka sasa.

Alisema kuwa kila mwaka ushindani na ubora wa mashindano yao unaongezeka na kuwavutia mashabiki wengi mchezo huo wa mkoa wa Dar es Salaam na mikoa ya jirani.

“Tumejipanga vyema kwenye mashindano haya na hasa ukizingatia kuwaklabu nyingi zimepiga hatua kubwa na kuleta ushindani huku waogeleaji wengi wakisaka medali, vikombe na vile vile kuhimarisha muda (Pbs),” alisema Hadija.

Waogeleaji watashindana katika umri tofauti ambao ni chini ya miaka nane, miaka tisa na 10, 11 na 12, 13 na 14. Pia kutakuwa na mashindano ya waogeleaji wenye umri kuanzia zaidi ya miaka 15.

Jumla ya staili tano za kuogelea zitashindaniwa katika mashindano hayo. Staili hizo ni backstroke, butterfly, freestyle, breaststroke na Individual Medley.

Waogeleaji pia watashindana katika relei mbalimbali ambazo zinaleta ushindani mkubwa.

Hadija alisema kuwa zawadi mbalimbali zitatolewa kwa washindi watatu wa kwanza katika kila tukio ambao watapewa medali ya dhahabu, fedha na shaba. Washindi wa jumla katika kila umri watazawadiwa vikombe.

“Tunaomba wadhamini mbalimbali wanaotaka kusaidia kufanikisha mashindano haya kujitokeza na kuinua vipaji kwa waogeleaji na kuleta maendeleo kwa ujumla,” alisema Hadija.