BILIONI 1.5 KUJENGA CHUO CHA VETA UYUI

 NA TIGANYA VINCENT, TABORA

 

BARAZA la Madiwani wa Halmashauri ya Wilaya ya Tabora(Uyui) limeishukuru Serikali kwa kuwapatia shilingi bilioni 1.5 kwa ajili ya ujenzi wa Chuo cha Ufundi Stadi (VETA) kisasa katika eneo la Isikizya.

Fedha hizo zitasaidia katika ujenzi wa majengo ya fani mbalimbali iiwemo ushonaji, ufundi umeme , uhazili na komputya  na uchomeleaji vyuma (welding) 

Kauli hiyo imetolewa leo na Mwenyekiti wa Halmashauri hiyo Said Ntahondi wakati wa mkutano wa pili wa Baraza la Madiwani wa kupitia taarifa za utekelezaji wa miradi mbalimbali ya maendeleo.

Alisema kukamilika kwa Chuo hicho cha VETA kutasaidia vijana ambao wamemaliza elimu ya Shule za Msingi na Sekondari kusomea kozi mbalimbali ambazo zitawawezesha kujiajiri wenye kwa ajili ya kuondokana na umaskini.

“Kwa kweli tunampongeza Rais wa Jamhuri ya Muungano wa Tanzania Mhe. Dkt. John Pombe Magufuli kwa kutapatia fedha hizo zitakazotuwezesha kujenga chuo cha kiasasa katika eneo la Isikizya…hii inaonyesha kuwa anatupenda sana watu wa Uyui” alisema.

Katika hatua nyingine Mwenyekiti wa Halmashauri hiyo alisema Hospitali ya Wilaya ya imeanza kufanya kazi kwa kutoa huduma za matibabu ya wagonjwa wan je.

Alisema kuwa hatua hiyo imefikia baada ya agizo la Mkuu wa Mkoa wa Tabora la kumtaka Mganga Mkuu wa Wilaya hiyo kuanza na utoaji wa huduma za awali katika majengo ambayo yamekamilika ili kuwapunguzia adha za wananchi kutembea umbali mrefu kutafuta huduma za matibabu.

Alisema kwamba kuanza utoaji wa huduma kwa Wagonjwa wa Nje(OPD) kumesaidia kupunguza usumbufu kwa wananachi wa wilaya hiyo kwa kupata huduma za matibabu kuwa karibu na wananchi.

Wakati huo huo Ntahondi alisema kuwa Halmashauri hiyo imetenga shilingi milioni 60 kwa ajili ya ujenzi wa majengo katika Sekondari saba ili kupunguza mrundikano wa wanafunzi wa Kidato cha kwanza.

Alisema sanjari na hilo wanaomba Ofisi ya Kanda ya Udhibiti ubora kuwasaidia ili Shule ya Sekondari ya Idete iweze kupokea wananfunzi wa Kidato cha Tano mwaka huu.

Ntahondi alisema wanaendelea na wanaandalizi kwa ajili ya uanzishwaji kwa Kidato cha Tano kama watakubaliwa ili Wilaya hiyo iweze na Shule za sekondari za Kidato cha tano na sita mbili ikiwemo ya hivi sasa ya Ndono.