SIMANZI YATAWALA KUAGWA KWA MIILI YA WALIOFARIKI WAKIGOMBEA MAFUTA YA UPAKO

 Badhi ya miili ikishushwa kwa ajili ya kutoa nafasi kwa ndugu jamaa na marafiki kutoa heshima za mwisho.

Badhi ya miili ikishushwa kwa ajili ya kutoa nafasi kwa ndugu jamaa na marafiki kutoa heshima za mwisho.

 Majeneza ya miili ya watu waliofariki katika tukio la kugombea mafuta ya upako.

Baadhi ya ndugu wakilia kwa uchungu wakati miili ikiwasili kwenye Uwanja wa Mashujaa mjini Moshi.

Simanzi yatanda kuagwa waliokufa kwa Mwamposa

>>>Viongozi wa dini wamtupia lawama Mwamposa

NA JABIR JOHNSON, MOSHI

Simanzi imetanda katika tukio la kuagwa kwa miili ya watu waliofariki wakati wakihudhuria ibada katika Kanisa la Inuka na Uangaze Februari Mosi mwaka huu linaloongozwa na Mtume na Nabii Boniface Mwamposa maarufu Bulldozer.

Tukio hilo la kuagwa kwa miili ya marehemu hao limefanyika katika viwanja vya Mashujaa mjini Moshi, Kilimanjaro Februari 3 mwaka huu na kuhudhuriwa na watu kutoka viunga mbalimbali mkoani humo.

Miili ya watu 20 waliopoteza maisha wengi wao wakiwa ni wanawake na watoto iliwasili katika viwanja hivyo saa 5: 56 asubuhi ikiwa katika magari ya Jeshi la Polisi mkoani Kilimanjaro aina  ya Ashok Leyland PT 4062 na PT 4374.

Baada ya kufika viwanjani hapo ilipokelewa kwa hisia za huzuni na majonzi huku wengine wakibubujikwa na machozi wakishindwa kuamini kama ndugu, jamaa na marafiki wao wakiwa ndani ya majeneza tayari kufanyiwa sala ya pamoja kisha kukabidhiwa kwa ajili ya utaratibu wa familia.

KAMANDA WA POLISI ATOA TAARIFA YA TUKIO LILIVYOKUWA

Kamishna Msaidizi wa Jeshi la Polisi (ACP) mkoa wa Kilimanjaro Said Hamduni alisema Mwamposa aliomba kibali cha siku tatu cha mkutano wake katika uwanja wa Majengo kuanzia saa 8:00 mchana hadi saa 12:00 jioni.

Aidha ACP Hamduni alisema mpaka sasa Jeshi la Polisi limewakamata watu saba kwa mahojiano zaidi akiwamo Mtume na Nabii  wa huduma hiyo ya Inuka na Uangaze Boniface Mwamposa kuhusiana na tukio hilo na kwamba sheria itafuata mkondo wake.

Katika tukio hilo watoto waliopoteza maisha ni watano na mwanaume mmoja huku wanawake wakiwa ni 14.                                                                   

VIONGOZI WA DINI WAMTUPIA LAWAMA MWAMPOSA

Viongozi wa Dini mbalimbali waliungana katika tukio hilo la kuiaga miili ya waliopoteza maisha  wakiwamo Askofu Glorius Shoo wa Tanzania Assemblies of God; Mchungaji Andrew Munis wa K.K.K.T; Fr. Colman Siriwa wa Kanisa la Katoliki na Sheikh Abdallah Mfaume ambaye aliiwakilisha Bakwata.

“Vifo vinavyotokana na majanga ya asili hivyo hatuwezi kuviepuka, lakini kilichotokea juzi kinaepukika kimetokea kwa uzembe wetu, na ulaghai wetu;” alisema Mchungaji Andrew Munisi.

“Tusitumie uhitaji watu kuwa mtaji wetu,…tusitumie Biblia isivyopasa,” alisisitiza Mchungaji Munisi.

“Maswali ni mazito na ni magumu sana, majibu ni mazito, Bakwata inawaomba wana kilimanjaro kuwa watulivu wakati wa kuyapata majibu ya suala hilo kwani hayahitaji majibu mepesi. Tujenge Imani katika mafundisho sahihi,” alisema Sheikh Abdallah

RC KILIMANJARO AWAASA WANANCHI NA VIONGOZI WA DINI

Mkuu wa Mkoa wa Kilimanjaro Anna Mghwira aliwataka viongozi wa dini kuwa na utaratibu mzuri wa kusimamia waumini wao katika maeneo yao ya ibada ili kusitokee tena mkanyagano ambao utaweza kuathiri maisha ya watu.

Aidha Dkt. Mghwira aliongeza kuwa Rais wa Jamhuri ya Muungano wa Tanzania John Pombe Magufuli alimpigia simu na kumtaka kuwa asifunge huduma hiyo ya Inuka na Uangaze na kwamba utaratibu wa ibada uendelee kama kawaida.