MADIWANI WATAKIWA KUCHUKUA HATUA KWA WANAOKULA FEDHA ZA MAPATO YA NDANI WALIZOKUSANYA

Na Tiganya Vincent

 

BARAZA la Madiwani wa Halmashauri ya Wilaya ya Tabora(Uyui) limetakiwa kuwachukulia hatua watendaji waliopewa jukumu la kukusanya mapato ya ndani ambao utumiaji fedha hizo kinyume cha Sheria na taratibu na kusababisha kuzalisha hoja za kikaguzi.

Kauli hiyo ilitolewa jana na Katibu Tawala Msaidizi Mkoa wa Tabora  anayeshughulikia Mamlaka  ya Serikali za Mitaa Emmanuel Kuboja wakati wa mkutano wa Baraza la Madiwani wa Halmashauri hiyo.

Alisema kuwa pindi inapobainiki mtumishi aliyepewa kukusanya mapato ya Halmashauri ametumia fedha alizokusanya kinyume cha taratibu achukuliwe hatua mapema badala la kumpa muda mrefu kurejesha fedha.

“Tusiwaone huruma watumishi waliopewa POS kwa ajili ya kukusanya mapato badala yake fedha hawapeleki Benki na kuishia mifukoni mwao…sioni sababu ya kuwaambia ndani ya mwezi warudishe fedha …wanatakiwa kurudisha palapale” alisisitiza.

Kuboja aliitaka Menejimenti ya Halmashauri ya Wilaya ya Tabora (uyui) kutotumia fedha za mapato ya ndani bila utaratibu wa kuyaingizwa Benki.

Alisema ni marufuku mkusanyaji kuendelea kukusanya nyumbani kwake ni lazima kila zinapokusanywa zipelekwe kwanza katika Benki husika ndio utaratibu wa matumizi halali upangwe.

“ Matumizi ya fedha mbichi ni hatari …zitasababisha upotevu wa mapato ya umma na kupelekea Halmashauri kuzalisha hoja ambazo zinawatia doa” alionya.

Aidha Katibu huyo Msaidizi wa Mkoa alimtaka Mkurugenzi Mtendaji kuchukua hatua haraka anapobaini mapungufu kwa wakusanyaji mapato ili kuendana na kasi ya Serikali ya Awamu ya Tano.