Mahenge Resources yakabidhi Ofisi za Vijiji

Mkuu wa Wilaya ya Mahenge, Ngollo Malenya, akipeana mkono wa pongezi  na John De Vries ambaye ni Mtendaji Mkuu wa Kampuni Mahenge Resources inayoshughulika na uchimbaji madini ya Kinywe, katikati ni Waziri wa Madini

 Mkuu wa Wilaya ya Ulanga, Ngollo Malenya, akionyesha funguo za majengo yaliyojengwa Mahenge Resources.

 Viongozi wa Kampuni ya Mahenge Resources.

 Waziri wa Madini Dotto Biteko akiwa na John De Vries ambaye ni Mtendaji Mkuu wa Kampuni ya Black Rock Mining.

Waziri wa Madini Dotto Biteko (wa pili kushoto), Mkuu wa Wilaya ya Ulanga, Ngollo Malenya (wa pili kulia) wakizindua majengo matatu ya serikali za kijiji yaliyojengwa na  Kampuni ya Mahenge Resources.

 Na Mwandishi Wetu

KAMPUNI ya Uchimbaji madini ya Kinywe, Mahenge Resources, imekabidhi majengo matatu yatakayotumiwa na vijiji vya Kisewe,Mdindo na Nawenga.

Majengo hayo ya kisasa yatakuwa ofisi za serikali ya vijiji hivyo.

Akizungumza Mahenge, Wilaya ya Ulanga, Mtendaji Mkuu wa kampuni ya Mahenge Resources, John De Vries, alisema lengo la kampuni yao ni kuhakikisha wanaboresha maisha ya watu wengine hasa katika maeneo ambayo uchimbaji wa madini unafanyika.

Vries alisema kurejesha kwa jamii ni wajibu na deni kwao.

“Kuwapa funguo wananchi ni deni la Mahenge Resources ili kuleta uthamini, haki na namna ya usawia kwa watu wote,”alisema.

Alisema kwasasa kampuni hiyo inatarajia kufanya tathimini ili kulipa fidia wananchi kabla uchimbaji wa madini haujaanza rasmi.

“Lazima tuhakikishe tunalipa fidia wananchi kabla hatujaanza ujenzi wa mgodi na kuchimba, awali tulishapeleka sampuli za madini ya kinywe kwenye maabara za kimataifa na kutoa majibu bora,”alisema.

Waziri wa Madini, Dotto Biteko, alisema kupitia mgodi huo wananchi watapata ajira za kitaalam na zisizokuwa za kitaalam kupitia kufanya biashara na hivyo kupata fursa ya kuuza vitu mbalimbali katika mgodi huo.

“Hii inamaanisha sehemu kubwa ya fedha zitokanazo na mgodi zitabaki hapa hapa Tanzania, naitazama Mahenge Resources kama mradi utakaofungua njia kwa awamu hii mpya ya migodi mikubwa na ya kati nchini ambayo itafunguliwa,”alisema.

Mkuu wa Wilaya ya Ulanga, Ngollo Malenya, wanashirikiana na Mahenge Resources kuhakikisha wananchi wanapata maendeleo.

Alisema kampuni hiyo inashiri katika kuchangia elimu, kulea watoto yatima, kujenga madarasa na ofisi za vijiji.