Mbunge Bwege atema cheche bungeni

NA MWANDISHI WETU

MBUNGE wa Kilwa Kusini, Said Bungara (CUF), maarufu Bwege amesema Watanzania wataendelea kupeleka malalamiko katika nchi zenye nguvu na taasisi mbalimbali duniani kutokana na Serikali kutotaka kuwasikiliza wanapowafikishia malalamiko yao.

Aidha, Bwege amewataka wabunge wa Chama Cha Mapinduzi (CCM), kuachana na utaratibu wa kukubali kila jambo linalosemwa na Serikali kwani sio kazi iliyowapeleka bungeni.

Mbunge huyo alisema hayo wakati akichangia mjadala bungeni ambapo aliweka wazi kuwa hawatasita kwenda kulalamika hadi hapo Serikali itakapoanza kuwasilikiza na kutatua changamoto zao.

“Leo tunaongea, tunasema hapa Serikali inajifanya masikio hayasikii ndio maana watu wanaenda kusema Marekani huko, nyie hamsikii, mtu akipambana anapambana kwa njia yoyote ndani na nje ya nchi.

Akienda mtu nje ya nchi ooh msalitim, msaliti gani wakati nyie hamsikii, mimi niliwambia waislam wamepigwa risasi wameuliwa Serikali ipo kimiyaaaa, msaliti nani, tukiwambia hamsikii mnaangalia nani kasema hamuangalii nini kasema,” anasema.

Kutokana na uchangiaji huo Spika Job Ndugai aliingilia kati na kumshauri Bwege achangie vizuri kutokana na suti ambayo aliiva siku hiyo.

“Mheshimiwa Bungara nitakumbukumbusha neno moja kwa suti uliyovaa leo bluu bahari inataka upige taratibu taratibu leo upo vizuri,” alisema.

Baada ya Spika kuchombeza Mbunge huyo machachari aliendelea kuchangia kwa kuwalaumu wabunge hawa wa CCM kwa kile alichodai kuwa hawasimamia Serikali bali wanasifia jukumu ambalo sio lao.

Bwege aliwaambia wabunge watambue kuwa wao ni wabunge wa Bunge la Tanzania na sio CCM au CUF hivyo waachane na utaratibu wa kila kitu Serikali ikisema liwe baya ndio zuri ndio ‘why’.

“Wabunge sasa hivi tumekuwa kama mbumbumbu, umeshiba eeeh, una njaa eeh ‘why’unachosimamia hukijui kazi yao kusimamia Serikali,” alisema Bwege.

Katika hali ambayo ilionesha kueleweka Spika Ndugai aliingilia tena kwa kuwahoji wabunge wa CC. “Jamani wabunge wote wa CCM mmepigwa ganzi hakuna hata raarifa alimalizia Spika Ndugai.

Pamoja na madongo hayo Bwege aliisifia Serikali katika usambazaji wa umeme vijiji na kuwataka waendelee kusambaza huduma katika sekta zote.

“Kusema ukweli kwa umeme, Alhamdulilah mmetufikisha vizuri na kama mtaendelea hivi kuhusu umeme mkaongeza kasi kwenye maji, mkawalipa wakandarasi, mkalipa wakulima wa korosho, mkawa kesi za kubambikia hakuna.

Mkaongeza mishahara kwa wafanyakazi, maandamano yawepo CCM yashinda na masheikh waliokaa ndani miaka nane wakaachiwa CCM dole,” alisema.

Alisema iwapo sifa itakuwa sifa ni umeme, masheikh hawatoki, mishahara haiongezi, wakulima hawalipwi na mengine mengi CCM wahesabu kuumia 2020.

Aidha, aliwapa angalizo wasifurahie kuwa pekee yao bungeni kwa kiwi watafarakana na hawatafanya jambo loote la maana.

Alitolea mfano Zanzibar ambapo CCM wapo peke yao na hakuna jambo la ajabu ambalo limefanyika.