Wadau 200 kujadili Mabadiliko ya Tabianchi

Mratibu wa Kampeni wa OXFAM, Mkamiti Mgawe (kushoto), akizungumza na waandishi wa habari kuhusu Kongamano na Maonesho ya Mabadiliko ya Tabianchi yatakayofanyika Machi 25 na 26 jijini Dar es Salaam. Katikati ni Meneja Miradi wa Masuala ya Mabadiliko ya Tabianchi wa Shirika la Kuendeleza Nishati Tanzania (TaTEDO), Mary Swai, akifuatiwa na Mkurugenzi wa Program wa Shirika lisilo la Kiserikali la FORUMCC, Angela Damas. (Picha na Suleiman Msuya).

Na Suleiman Msuya
 

WADAU zaidi ya 200 kutoka sekta mbalimbali nchini wanarajiwa kushiriki Mkutano Mkuu wa Sita wa Mabadiliko ya Tabianchi na Maonesho utakaofanyika jijini Dar es Salaam, Tanzania kuanzia Machi 25 hadi 26 mwaka huu.

Mkutano huo unatarajia kukutanisha wadau kutoka asasi za kiraia, waakilishi wa Serikali, wabunge, washirikia wa maendeleo, taasisi za elimu, wabunifu, sekta binafsi, vijana, uwakilishi wa jamii, wanawake na waandishi wa habari.

Hayo yamesemwa na Mkurugenzi wa Program wa Shirika lisilo la Kiserikali la FORUMCC, Angela Damas wakati akizungumza na waandishi wa habari jana jijini hapa.

Damas alisema Shirika hilo linalojihusisha na kuleta ushawishi wa kuchukua hatua kustahimili/kupunguza athari za Mabadiliko ya Tabianchi hivyo mkutano hup utatopa  majibu sahihi ya nini kifanyike kukabiliana na hali hiyo.

“FORUMCC na washirika wake walikaa kuandaa Mkutano Mkuu wa Kitaifa wa Mabadiliko ya Tabianchi ambao umekuwa ni utaratibu wa kila mwaka tangu mwaka 2015.

Mwaka huu, Mkutano Mkuu wa Sita wa Mabadiliko ya Tabianchi na Maonesho utafanyika jijini Dar es salaam kuanzia tarehe 25 hadi 26 Machi 2020. Tukio hili muhimu kwa kuwa litakutanisha watunga sera, watendaji na wanasayansi ambao watatoa taarifa za utafiti kuhusu hali ya Mabadiliko ya Tabianchi,” alisema.

Alisema Tanzania inahitaji kuchukua hatua za haraka kukabiliana na Mabadiliko ya Tabianchi kama ilivyo kwa nchi nyingine za Afrika. “Hatua hizo za haraka zinapaswa kuchukuliwa kutokana na hali halisi iliyopo na inayoendelea ya majanga kama vile mafuriko, mvua zisizotabirika, ukame na kukosa mazao.

Pia vifo vya wanyama, kuongezeka kwa kina cha bahari, majichumvi katika maji baridi, na magonjwa yanayoambatana na Mabadiliko ya tabianchi,” aliongeza.

Mkurugenzi huyo alisema athari za Mabadiliko ya Tabianchi zimekuwa hatarishi zaidi kwa watu; zinaathiri sekta zote za maendeleo, kupunguza/kudumaza jitihada za kufikia maendeleo na mafanikio.

“Mkutano utakuwa na tija katika kuhamasisha uwajibikaji wa masuala ya Mabadiliko ya Tabianchi na kujenga mahusiano stahiki ili kuharakisha jitihada za kukabiliana na Mabadiliko ya Tabianchi.

Pia kusaidia kuiweka Tanzania katika uelekeo wa kupunguza utegemezi wa malighafi zinazopelekea uzalishwaji wa hewa ukaa na kustahimili athari za Mabadiliko ya Tabianchi zisizoepukika,” alisema.

Damas alisema mwaka huu, mkutano utakuwa na kauli mbiu: Sayansi, Sera na Utekelezaji: Ushiriki wa Pamoja Kuhimili Athari za Mabadiliko ya Tabianchi, Uelekeo Stahiki Kupunguza Hewa Ukaa na Maendeleo Endelevu.

Kwa upande wake Meneja Miradi wa Masuala ya Mabadiliko ya Tabianchi wa Shirika la Kuendeleza Nishati Tanzania (TaTEDO), Mary Swai alisema athari za Mabadiliko ya Tabianchi ni kubwa hivyo jamii inapaswa kubadulika na kutumia mbinu mbadala.

Swai alisema TaTEDO imekuwa ikifanya kazi na jamii hasa yenye kipato cha chini ili kuwezesha kuondokana na nishati ambazo zinahatarisha madhara ya Mabadiliko ya Tabianchi.

“Sisi tumekuwa tukisaidia jamii kutumia vyanzo mbadala katika shughuli zinazohitaji nishati msingi mkubwa ni kupunguza athari za Mabadiliko ya Tabianchi na kusema ukweli kuna hatua kidogo ni imani yetu kongamano hilo litaweza kutoa hali halisi,” alisema.

Meneja huyo amesisitiza matumizi ya vyanzo mbadala ambavyo haviathiri mazingira ili kuhakikisha madhara kama ya joto, ukame na magonjwa yanaepukika.

Naye Mratibu wa Kampeni kutoka OXFAM, Mkamiti Mgawe alisema mabadiliko hayo yameathiri jamii hasa wakina mama ambao wanajihusisha na kilimo kutokana na kukosekana kwa utabiri sahihi wa mvua na kuibuka wadudu haribifu.

“Mabadiliko ya Tabianchi yamebadilisha sana sekta mbalimbali hasa kilimo ambacho kinahusisha kundi kubwa la Watanzania,” alisema.

Mgawe alisema wakati umefika kwa kuwepo sera nzuri ambazo zitaweza kumnufaisha kila mdau ambayo anataka kuendelea kuishi kwenye ulimwengu hasa mwanamke.

Mtaribu huyo alisema dunia nzima inapambana kuhakikisha kiwango cha joto cha 1.5 hakifikiwi na njia ya kufanikiwa katika hilo ni kupunguza uharibifu wa mazingira.

“Tunaposema Mabadiliko ya Tabianchi sio jambo dogo kwani yanasabaisha magonjwa, ukame, njaa, joto, uharibifu wa miundombinu, wadudu na mengine mengi ni jambo pana linahitaji ushiriki wa kila mdau,” alisema.