Simba Jamii Tanzania yaendelea kugusa jamii

 Baadhi ya wanakikundi wa Kundi la Simba Jamii Tanzania Enterprises (SJTE), mkoa wa Mbeya wakimkabidhi kiti cha matairi, Mwanafunzi Mlemavu wa Shule ya Msingi Nzovwe, Lucy Furaha. (Na Mpiga Picha Wetu).

Na Mwandishi Wetu

 

WANACHAMA na wapenzi ya Klabu ya Simba nchini na nje ya nchi wameomba kusaidia makundi mbalimbali ya kijamii ambayo yanakabiliwa na changamoto za kimaisha.

Ombi hilo limetolewa na Kiongozi wa Msafara wa Wajumbe wa Kundi la WhatsApp la Simba Jamii Tanzania Enterprises (SJTE), mkoa wa Mbeya Jacob Madeje wakati akikabidhi msaada wa kiti cha matairi ‘wheelchairs’ na mahitaji mengine muhimu kwa Mwanafunzi Mlemavu wa Shule ya Msingi Nzovwe Lucy Furaha.

Alisema wamemkabidhi Lucy kiti hicho ambacho kinathamani ya shilingi 500,000 na vitu vingine ili viweze kumsaidia kwa ajili ya mahitaji yake ya kila siku.

Madeje alisema wana Simba popote walipo wanajukumu la kusaidia makundi maalum wakiwemo walemavu ili nao waweze kushiriki shughuli za uzalishaji kama raia wengine.

“Tunawahimiza wana Simba wenzetu na jamii kwa ujumla kukumbuka kujitolea kwa jamii isiyojiweza ili kupata baraka na kuondokana na mikosi,” alisema.

Alisema makundi ya WhatsApp na matawi ya wana Simba yanapaswa kutumika kusaidia na hiyo itakuwa wametekeleza maelekezo ya Mungu ambaye anasisitiza kusaidia wasiojiweza.

 Kiongozi huyo wa msafara alisema SJTE ni kundi la mashabiki na wanachama wa Simba ambalo limekuwa na muendelezo wa kutoa misaada kwa Watanzania ambao wanachangamoto mbalimbali.

“Sisi SJTE, ni kundi la wanachama na washabiki zaidi ya 200 ambao tumeamua kushirikiana kwa pamoja kusaidiana wenyewe kwa wenyewe na kusaidia makundi mbalimbali yenye mahitaji,” alisema.

“Kundi hilo hivi karibuni lilikabidhi tanki moja ya lita 2,000 pamoja na Solar kwa Kituo cha Yatima cha Ukhty Raya kilichopo Mindu Morogoro.

Pia limekabidhi mabati kwa misikiti kadhaa na linaendelea kutoa misaada mingine mbalimbali kwa kila jamii ikiwamo ugawaji wa ‘wheelchairs’ kwa watoto walemavu pahala popote hapa nchini,” alisema.

Akizungumza baada ya kupokea msaada huyo Lucy alisema anashukuru kundi hilo kwa kuwa limeweza kumuondolea changamoto iliyokuwa inamkabili kwa muda mrefu.

“SJTE imefungua upya maisha yangu, naamini nitaweza kushiriki masomo kwa nguvu zote naomba Mungu awasaidie na kuwaongezea kipato zaidi waendelee kusaidia wengine,” alisema.

Mwalimu Mkuu wa Shule ya Msingi Nzovwe, Emilia Ndimbo, Mwenyekiti Kamati ya Shule Happy  Bakamba na Afisa Elimu Kata Angomwile Mwanansyobe wamesema msaada uliotolewa kwa Lucy utaweza kubadilisha maisha yake.