Coastal Union kulamba asilimia 30 Mwamnyeto akitimka Yanga

NA ABDALLAH HIJA

UONGOZI wa Coastal Union ‘Wagosi wa Kaya’ yenye maskani yake jijini Tanga, umefunguka kuwa  utafaidika na usajili wao Beki wao wa zamani Bakari Mwamnyeto aliyejiunga na  Yanga SC hivi karibuni, kwa kupata dau la asilimia 30  endapo Wanajangwani watamuuza timu nyingine.  

  Mwamnyeto aliyejiunga na Yanga kwa ajili ya kususka upya kikosi chao kwenye dirisha hili la usajili linaloendelea hivi sasa, kwa mkataba wa miaka miwili akitokea kwa Wagosi hao wa Kaya.

Inaelezwa kuwa Wagosi wa Kaya watafaidika na dili la Mwamnyeto endapo atauzwa kwenye timu nyingine huku wakikubaliana na wanajangwani kuwa thamani ya  beki huyo isiwe chini ya Dola  laki 1, huku Coastal Union watalamba asilimia 30 ya fedha hizo.

Akizungumzia hilo, Mwenyekiti wa Coastal Union, Steven Mguto alisema wanatengeneza  wachezaji ili wapate maendeleo na wakati huohuo klabu ifanikiwe kibiashsara kwa hiyo suala la Mwamnyeto ni la mwanzo na wengine watafuata.

“Kwa kiasi fulani hatujafaidika makubaliano yetu na Yanga mchezaji atacheza kwao, ikiwa wataweza kumuuza kwa klabu nyingine  basi kiasi hicho kisiwe chini ya Dola laki 1, tulikubaliana  kwamba sisi tutachukua asilimia 30  na wao watachukua 70,” alisema Mwenyekiti huyo wa Wagosi wa Kaya.

Katika hatua nyingine Mguto aliweka wazi suala la wao kuingia makubaliano ya kudhaminiwa na Kampuni ya GSM kuelekea kwenye msimu wa Ligi Kuu Tanzania Bara (VPL) utakaoanza hivi karibuni.

Mguto alisema jitihada walizofanya wamekubaliana na GSM waweze kuwadhamini ikiwa si dhambi kufanya hivyo kwao japokuwa wapo na Yanga.

“Jitihada tulizozifanya tukakubaliana na wadhamini GSM, waweze kutudhamini, si dhambi kuwadhamini yanga na sisi na hata ikiwezekana na timu nyingine hao wanalenga biashara yao.

 
Kusema kweli sijaweka bayana kwamba  makubaliano yetu ya udhamini yakoje ni siri kati yetu na wanaotudhamini”alisema Mguto.