ACT Wazalendo chahofia miundombinu Soko la Kariakoo

Mwandishi Wetu

CHAMA cha ACT Wazalendo kimeelezwa kushtushwa na ajali ya moto iliyoteketeza Soko Kuu la Kariakoo Jumamosi Julai 9, 2021 na kusababisha taharuki, majonzi na hasara kubwa kwa wafanyabiashara wa soko hilo.

Taarifa ya chama hicho kwa umma iliyotolewa na Naibu Katibu Mwenezi wake, Janeth Rithe leo Julai 13, 2021 imesema chama hicho kinatoa pole kwa wafanyabiashara wote wa soko hilo waliopoteza mali zao na kuwasababishia umaskini ambao hawakuutarajia.

"Sisi ACT Wazalendo tukiwa sehemu ya Jamii ya Watanzania tunatoa ushauri kwa mamlaka za Serikali kuamka sasa na kupitia maamuzi yao kuhusu mazingira na miundombinu yote inayolizunguka Soko la Kariakoo."

"Mathalani, taarifa ya Jeshi la Zimamoto kwamba soko hilo halina Kituo au (vioski) maalum  vya maji kwa ajili ya dharura kama hizo linashtua sana." amesema Rithe.

Mbali na hilo ACT Wazalendo kimesema kitendo cha mamlaka za Serikali kuruhusu ujenzi holela wa maduka yaliyopachikwa pembeni kwa kulizunguka Soko la Kariakoo tofauti kabisa na asili ya muundo wa soko hilo unaweza pia kuwa chanzo cha moto huo

na hata kusababisha ugumu kwa vikosi vya Zimamoto na Uokoaji kufanyakazi zao kwa ufanisi.

"Aidha tumeshangazwa mno na uwezo usioridhisha wa Kikosi cha Zimamoto na Uokoaji ambacho hakipo umbali mrefu na Soko la Kariakoo lakini kilishindwa kudhibiti moto huo usisababishe madhara makubwa kama ilivyotokea."amesema.

Aidha Rithe ameishauri  Serikali kuamua sasa kuweka miundombinu mizuri naya kisasa kwenye masoko, stendi za mabasi na maeneo yote yenye msongamano  wa watu ili kuepuka kusababisha hasara na pesa za walipakodi kuteketea kwa mambo yanayoweza kuepukika.