POLISI KANDA MAALUM DAR ES SALAAM YAKAMATA WATU 2 KWA TUHUMA ZA KUJARIBU KUHARIBU MIUNDOMBINU YA DARAJA LA TANZANITE

Jeshi la Polisi Kanda Maalum ya Dar es Salaam linaendelea kusimamia mifumo ya kuzuia vitendo vya kiuhalifu katika maeneo mbalimbali ya Jiji la Dar es Salaam.

Katika hatua hiyo Jeshi limewakamata watu wawili (2) waliokuwa wanajaribu kuharibu kwa kukata baadhi ya vyuma vya ngazi moja ya nguzo namba P9 ya Daraja la Tanzanite lililopo maeneo ya Salender, Ilala.

Watuhumiwa hao ambao majina yao (yamehifadhiwa kwa sababu za kiuchunguzi) walikamatwa tarehe 02/04/2022  saa  10 alfajiri wakiwa wanajaribu kufungua vyuma  vilivyopo kwenye nguzo  ijulikanayo kama  P9 ambayo ipo  kwenye  daraja hilo. Wanahojiwa kwa kina na watafikishwa kwenye vyombo vya  kisheria kwa hatua zaidi.

Pia Jeshi la Polisi limewakamata watu wengine kumi (10) waliokutwa chini ya Daraja huku wakidai wanaokota vyuma chakavu kwa ajili ya biashara ya vyuma.   Watuhumiwa hao   pia  wanahojiwa kwa kina ili kubaini malengo yao  kwa ujumla chini ya Daraja hilo yalikuwa ni nini na kuona kama wanamahusiano na wale waliokuwa wanajaibu kuiharibu baadhi ya miundombinu ya nguzo ya daraja hilo.

Jeshi la Polisi linatoa onyo kali kuwa halitamvumia mtu au kikundi chochote kinachojihusisha kwa namna yoyote ile kujaribu kuharibu miundombinu ambayo imejengwa kwa manufaa ya umma, Ulinzi katika eneo hilo na maeneo mengine umeeendelea kuimarishwa na atakayejaribu kuiharibu  atakamatwa na mifumo ya kisheria ya kishughulika nae itazingatiwa.