Kanisa lamlilia Rais Samia

 

Askofu kiongozi wa Kanisa la Calvary Assemblies of God, Imelda Maboya akizungumza na waandishi wa habari kuhusu uvamizi kanisani hapo.

 Waamini wakiendelea na ibada kanisani hapo 

Na Mwandishi Wetu 

 

 

UONGOZI wa Kanisa la Calvary Assemblies of God umeiomba Serikali ya Jamhuri ya Muungano wa Tanzania inayoongozwa na Rais Samia Suluhu Hassan iwasaidie kuwadhibiti baadhi ya wahuni wachache wenye nia ovu ya kutaka kuondolewa kwa kanisa hilo lililoko Ubungo Maziwa jijini Dar es Salaam.

 

Akizungumza katika ibada ya Jumapili kanisani hapo, Mchungaji kiongozi wa kanisa hilo, Imelda Maboya alisema wako katika eneo hilo kwa zaidi ya miaka 22, ameshangazwa na wavamizi kuwavamia Kanisani hapo mara mbili wakati malengo yao ni kuiombea jamii ya watanzania.

 

Maboya alisema ibada yao kila miezi miwili huiombea amani nchi, kuombea viongozi na wananchi.

 

Alisema eneo waliloko ni la Tanzania Steal Pipe (TSP) ambao ndio wamiliki halali wa eneo hilo lakini wako hapo kwa ofa maalum iliyotolewa kipindi cha ubinafsishaji wa mashirika ya umma (PCRC) ambako walielezwa kwamba ikitokea patauzwa, watapewa kipaumbele.

 

"Mahali hapa lilipo kanisa kulikuwa ni kichaka cha wavuta bangi, walevi na wahuni wengine, kanisa limesaidia kuiondosha hali hiyo," alisema.

 

Aliiomba serikali kuanzia wilaya, mkoa na Taifa kuwasaidia ili kuliweka sawa suala hilo.

 

Sylvia Rweyemamu ambaye ni muumini wa kanisa hilo alisema mama Samia asikie kilio chao kwani mbali ya ibada pia wanajipanga kutoa elimu kwa vijana kuhusu sakata la Panya road ambalo ni janga kwa nchi yetu.

 

Anna Nderumaki alisema alishangazwa na uvamizi wa watu zaidi ya 100 waliovamia Kanisani hapo kwa sababu katika maisha yake hajawahi kuona uvamizi kwenye nyumba ya ibada.

Naye Ezron Matowo alimshukuru Rais Samia ni msikivu na mwenye huruma, hivyo suala kama hilo ni dogo zaidi kwake kwa sababu anayoyatekeleza yanaonekana.

 

Muumini Placid Malaki alitumia fursa hiyo kuiomba serikali kuwaongezea eneo hilo kwa ajili ya kufanya ibada kwani wanachotekeleza kwa ajili ya nchi ni kikubwa zaidi.