Dk Tulia: Rais Samia amefanya zaidi

Na Seleman Msuya, Rufiji

SPIKA wa Bunge, Dk Tulia Ackson amesema kasi ya utekelezaji wa miradi inayofanywa na Serikali ya Awamu ya Sita chini ya uongozi wa Rais Samia Suluhu Hassan inamfanya amuone anafanya zaidi.

Dk Tulia amesema hayo leo wakati akizungumza mbele ya Rais Samia kwenye hafla ya zoezi la ujazaji maji katika Bwawa la Julius Nyerere (JNHPP), iliyofanyika Rufiji mkoani Pwani.

Spika Tulia amesema baada ya kupita na kuangalia shughuli zilizofanyika ametambua kuwa kazi kubwa imefanyika kwa kipindi kifupi cha Rais Samia.

"Mimi nadiriki kusema Rais Samia umefanya, unafanya na kuzidi kwani mradi huu umefikia sehemu nzuri ya kupongezwa,"amesema.

Amesema mradi huo kwa sasa umefikia zaidi ya asilimia 70 hivyo ni matumaini yake utaisha katika muda uliopangwa.

Dk Tulia amesema yeye kama kiongozi wa Muhimili wa Bunge atahakikisha unazungumziwa vizuri ndani na nje ya Bunge.

"Bunge litaendelea kuunga mkono miradi yote ambayo inatekelezwa nchini, ukiwemo huu wa JNHPP ambao unaenda kukuza uchumi wetu siku zijazo,"amesema.

Spika Tulia amesema ni imani yake mradi huo utaenda kugusa sekta zingine na nchini kwa ujumla.