LATRA yakutana na Wadau wa Usafiri Ardhini, yatoa Mapendekezo ya Nauli za SGR

Na Hussein Ndubikile, Dar es Salaam

Baraza la Ushauri wa Huduma za Usafiri wa Ardhini (LATRA) limetoa mapendekezo ya Nauli za Treni ya Mwendokasi (SGR) kwa Daraja la kawaida kutoka Dar es Salaam Hadi Morogoro kwa Sh 24,794 kwa Mtu Mzima wakati kwa mtoto mwenye umri wa miaka 4-12 anatarajiwa kulipa Sh 12,397.

 Akizungumza katika Mkutano uliowakutanisha Wadau wa Usafiri nchini jijini Dar es Salaam, Mkurugenzi wa Mamlaka ya Udhibiti wa Usafiri wa Ardhini (LATRA), Habibu Juma Saidi Suluo amesema kuwa kwa Daraja la Kati kutoka Dar es Salaam kwenda Morogoro gharama ya Nauli inatarajiwa kuwa Sh 29,752 wakati kwa mtoto mwenye umri wa miaka Kati miaka hiyo hiyo itakuwa ni Sh 14,876.

"Kwa upande wa Nauli ya kutoka jiji la Dar es Salaam hadi Dodoma kwa Daraja la kawaida mtu Mzima anatarajiwa kulipa Sh 59,494 wakati mtoto anatarajiwa kulipa  shilingi 29,747". Amesema Suluo.

Suluo ameongeza kuwa nauli  kwa Daraja la Kati kwa mtu mzima anatarajiwa kulipa Sh 71,392 huku mtoto natarajiwa kulipa Sh 35,696.

Awali Mkuu wa Wilaya ya IIala, N'gwilabuzu Ludigija akimwakilisha Mkuu wa Mkoa wa Dar es Salaam, Amos Malala amesema Serikali ya awamu ya sita imelenga kuboresha Miundombinu ili kuweza kumrahisishia mwananchi.

"Katika kuhakikisha tunaboresha huduma za reli kesho tunatarajia kusaini mkataba wa Ujenzi wa Reli kutoka Kigoma hadi Tabora". Amesema Ludigija.

Ameongeza kuwa kutokana na usafiri huo kuwa ni muhimu nchini ameishauri taasisi hiyo isiridhie nauli hizo mpaka watakapofikia makubaliano ya wadau wa usafiri nchini juu ya nauli hizo.

"Kila mmoja aliyeopo hapa ajisikie na awe huru kutoa maoni yake kwa lengo la kupata mapendekezo bora". Amesema Ludigija.