YANGA NA MACHOZI YA WAGOSI WA KAYA TAIFA

Na Mwandishi Wetu

Ligi Kuu Soka Tanzania Bara NBC PL inaendelea leo kwa michezo mitatu kupigwa katika viwanja vitatu tofauti huku Mabingwa watetezi Young Africans watawakaribisha Wana Mangushi Coastal Union Dimba la Benjamin Mkapa.

Yanga ambao wako kileleni mwa msimamo wa NBC PL wanashuka Leo kwakabili Wagosi wa Kaya mtanange ambao utalindima kuanzia majira ya saa 12:15 jioni.

Coastal Union wanashuka dimbani leo bila Kocha wao Mkuu Yusuph Chipo waliyemtupia vilago hapo jana.

Kwa mujibu wa taarifa ya Klabu hiyo imeeleza ni makubaliano ya pande mbili baada ya timu hiyo kuwa na mwenendo mbaya katika muendelezo wa michezo ya Ligi Kuu.

Je Yanga ni kama watamsukum mlevi kutokana na kiwango hafifu cha wa Wagosi wa Ndima? Dakika 90 zitaamua kitakachoenda kujiri.

Mchezo mwingine utapigwa mapema kati ya Ruvu Shooting dhidi ya Mtibwa Sugar mtanange utakao chezwa kwenye Dimba la Uhuru kuanzia majira ya saa 10:00 jioni.

Ruvu Shooting wanashuka dimbani kusaka alama tatu muhimu baada ya kuwa na matokeo yasiyoridhisha licha ya kumkabidhi timu Kocha Mbwana Makata kutoka kwa Charles Boniface Mkwasa.

Huku mchezo wa kufunga siku Namungo FC wanawaalika Ihefu SC Uwanja wa Majaliwa Ruangwa mkoani Lindi utakao chezwa majira ya saa 2:15 usiku.