Naibu Katibu Mkuu Dkt. Rwezimula afunga Mkutano wa Kimataifa wa TENMET kuhusu Ubora wa Elimu

Na Hussein Ndubikile, Dar es Salaam

NAIBU Katibu Mkuu Wizara ya Elimu Sayansi na Teknolojia Dkt. Franklin Rwezimula amefunga Mkutano wa Tatu wa Kimataifa wa Ubora wa Elimu ulioandaliwa na Mtandao wa Elimu Tanzania (TENMET) na kuwakutanisha Wadau wa Elimu kutoka Nchi 10 za Afrika.

Akizungumza wakati wa kufunga Kongamano hilo Jijini Dar es Salaam Dkt. Rwezimula amesema Serikali itaendelea kushirikiana na sekta binafsi, wadau na Taasisi mbalimbali zinazojihusisha na maswala ya Elimu katika kuboresha mazingira ya Elimu nchini ili iweze kumkomboa Mtoto wa Kitanzania.

Dkt. Rwezimula amesema kuwa Serikali hajajikita tu katika kutoa ahadi mbalimbali juu ya Elimu bali imeendelea kuboresha mazingira ya Elimu kwa kujenga madarasa na nyumba za walimu, kupitia mitaala, kiboresha sera, Kuboresha uwezo wa walimu kwa kuwapa mafunzo ya mara kwa mara ili kuhakikisha wanakuwa na uwezo wa kuwafundisha wa watoto kulinganana na kasi ya mabadiliko ya Dunia inavyokwenda.

"Serikali itaendelea kuhakikisha elimu nchini inakuwa bora na inayoweza kumkomboa mtoto wa Kitanzania, na ili kufanikisha hilo tutashirikiana na wadau mbalimbali kama TENMET na tunawapongeza kwa kongamano hili ambalo linatoa chachu ya kufanya madiliko mbalimbali katika sekta ya elimu," amesema Dkt. Rwezimula.

Ameeleza kuwa katika majadiliano yao wameweza kubainisha kuwa kunahitajika kuongeza kasi ya utoaji wa mafunzo mbalimbali ya mara kwa mara kwa walimu ili kuhakikisha elimu wanayowapa wanafunzi inakidhi matakwa ya elimu bora ikiwa ni pamoja na kuwa na mitaala yenye kukidhi matakwa ya Dunia ya sasa na kutoa mawanda mapana ya mtoto kujifunza kidigital na kupewa nafasi ya kuonesha ujuzi na kipawa chake nje ya elimu ya darasani.

Kwa upande wake Mratibu wa Mtandao wa Elimu Tanzania TENMET Ochola Wayoga amesema katika siku tatu za kongamano hilo wameweza kujadili kwa kina maswala ya Elimu ikiwemo kujadili kuhusu maeneo ya kujifunzia,nyenzo za kufundishia,kujifunza kwa njia za digital, changamoto za mimba za utotoni,mitaala na sera ya elimu.

Nae Mwenyekiti wa Bodi ya TENMET Faraja Nyalandu ameishukuru Serikali ya Awamu ya Sita inayoongozwa na Rais Dkt Samia Suluhu Hassan kwa ushirikiano inaoutoa kwa kwao pia amewashukuru wadau wote wa elimu na Taasisi mbalimbali za ndani na nje ya nchi zilizotoa muda wao kushiriki katika kongamano hilo la Kimataifa la Ubora wa Elimu.

Faraja ameongeza kuwa Tenmet kipaumbele chake kikubwa ni kuhakikisha Tanzania na Afrika kwa ujumla inakuwa na Elimu bora kulingana na Kasi ya mapinduzi ya nne ya viwanda Dunia.