Barnaba anajipanga kuachia video ya wimbo wake wa ‘Sorry’

Na Elizabeth John

MKALI wa muziki wa kizazi kipya nchini, Barnaba Elias ‘Barnaba’ anajipanga kuachia video ya wimbo wake wa ‘Sorry’ ambao unafanya vizuri katika vituo mbalimbali vya redio.

Akizungumza na Habari Mseto jijini Dar es Salaam, Barnaba alisema kutokana na ubora wa kazi hiyo ameamua kuharakisha kutengeneza video ya kazi hiyo ili kuwapa burudani iliyokamilika mashabiki na wapenzi wa kazi zake.

Alisema anashukuru wimbo huo umepokelewa vizuri na mashabiki wake kitu ambacho kinampa matumaini ya kuendelea kutoa burudani kwa mashabiki wake pamoja na jamii inayomzunguka.

“Najipongeza mwenyewe kwasababu kazi zangu nyingi huwa zinapokelewa vizuri hii inaonyesha kama watanzania wenzangu wananikubali katika tasnia hiyo na mimi nipo tayari kutoa burudani kwao kwa lengo la kukuza na kuendeleza muziki huo,” alisema Barnaba.

Alisema yupo katika hatua za mwisho za uandaaji wa video ya kibao hicho, na anawaomba wasikae mbali nay eye kuna vitu vingi ambavyo ameawaandalia.

Barnaba alishawahi kutamba na vibao vyake kama, Wrong Number, Tulizana, Magubegube na nyinginezo ambazo zilimtambulisha na kufanya vizuri katika tasnia ya muziki wa bongo fleva.